Problemalyq kredıtter qorynyń ókilettigi keńeıtilmek

NUR-SULTAN. QazAqparat – «Problemalyq kredıtter qory» aktsıonerlik qoǵamynyń ókilettigin keńeıtý josparlanyp otyr. Bul týraly QR Qarjy mınıstrligi Memlekettik kirister komıtetinen málimdedi, dep habarlaıdy QazAqparat tilshisi.

«Problemalyq kredıtter qory» AQ men «Ońaltý jáne aktıvterdi basqarý kompanııasy» AQ-ny qaıta uıymdastyrý týraly» QR Úkimetiniń 2018 jylǵy 16 qarashadaǵy № 766 qaýlysyna tolyqtyrý engizý týraly» qaýly jobasy ashyq normatıvtik-quqyqtyq aktilerdiń ınternet-portalynda ornalastyryldy.

Joba 2022 jylǵy 11 qańtarda Memleket basshysynyń QR Parlamenti Májilisiniń otyrysynda bergen tapsyrmalaryn iske asyrý jónindegi is-sharalar josparynyń 44-tarmaǵyn oryndaý aıasynda ázirlendi.

Bul turǵyda «Problemalyq kredıtter qory» AQ-ǵa kedendik tólemderdi, salyqtardy, arnaıy, dempıngke qarsy, ótemaqy bajdaryn, ósimpuldardy, paıyzdardy tóleýdi júzege asyratyn tóleýshiler, ýákiletti ekonomıkalyq operatorlar, keden isi salasyndaǵy qyzmetti júzege asyrǵan tulǵalar jáne úshinshi tulǵa kepilge salǵan múlikti, sondaı-aq kórsetilgen tulǵalardyń ıeligindegi shektelgen múlkin nemese memlekettik kirister organdary ustaǵan taýarlardy ótkizý jónindegi fýnktsııa berilmek.

Osy túzetýlerdi iske asyrý maqsatynda QR Qarjy mınıstrligimen tıisti joba ázirledi.

Bul Joba ashyq normatıvtik-quqyqtyq aktilerdiń ınternet-portalyna 2022 jylǵy 29 shildede ornalastyrylǵan. Jobany jarııa talqylaný merzimi 2022 jyldyń 12 tamyzǵa deıin jalǵasady.