Prezıdenttiń bir jyl burynǵy saılaýaldy ýádeleri qalaı oryndalyp jatyr

<p>Saıasattanýshy Danııar Áshimbaev Prezıdent Qasym-Jomart Toqaevtyń byltyrǵy saılaý aldynda bergen ýádeleri qalaı oryndalyp jatqany týraly paıymyn &laquo;Vremıa&raquo; qoǵamdyq-saıası gazetine bergen suhbatynda aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.&nbsp;</p>

«Konstıtýtsııaǵa Prezıdenttiń ókileti merzimin 7 jylmen shekteý týraly túzetý engizildi. Sondaı-aq onyń týystaryn Prezıdent ókileti kúshinde bolǵan kezde joǵary laýazymdy qyzmetke taǵaıyndaýǵa tyıym salyndy. Qazir birtindep bılikti ortalyqsyzdandyrý protsesi júrip jatyr. Birneshe saılaý ótip, Senat pen Májilistiń quramy reformalandy. Parlamentte táýelsiz depýtattar paıda boldy», - deıdi sarapshy.

Saıasattanýshy aýdan ákimderiniń saılaýy ilki joba retinde qolǵa alynǵanyn da ózgeriske balap otyr.

«Keıingi ondaǵan jylda bul máseleniń sheshimi tabylmaı kelgenin eske salaıyn. Árıne, bul sharanyń tıimdiligine baǵa berýge áli erte. Onyń názik tustaryn áli de shırata túsý kerek. Salyq jáne Bıýdjet kodeksterine bıýdjetti de ortalyqsyzdandyrý baǵytynda túzetýler ázirlenip jatyr», - deıdi Danııar Áshimbaev.

Sarapshy memlekettik josparlaý salasynda áli de pysyqtaıtyn tustar bar ekenin aıtady. Onyń sózinshe, osydan 2,5 jyldan beri qabyldanyp jatqan ulttyq jobalardyń qolaısyz bolyp shyqqanyn keıbir mınıstrlerdiń ózi moıyndaǵan.

«Qazir josparlaý júıesi qaıta pysyqtalyp jatyr. Jeltoqsanǵa qaraı josparlaýdyń jańa júıesin qabyldaıtyn shyǵar. Qazaqstan damýynyń 2050 jylǵa deıingi jańa strategııasy qabyldanyp, 2029 jylǵa deıingi is-sharalar jospary bekitiledi», - deıdi ol.

Saıasattanýshy «Samuryq-Qazyna» ál-aýqat qorynyń jumysyn reformalaý óte aýyr júrip jatqanyn aıtady.

«Árıne, iske asyrýy qıyn reformalar bar. Sonyń biri – «Samuryq-Qazyna» ál-aýqat qory. Onyń jumysyna kóńili tolmaıtyndar kóp. Biraq qordyń aınalasyndaǵy nesıeniń kóptigi sonsha, qazir taratyp jiberse, mindettemelerdiń bári bıýdjettiń moınyna ilineıin dep tur. Sondyqtan Úkimet «Samuryqtyń» máselesin bir jaǵyna shyǵarýǵa tyrysyp jatyr. Biraq qordyń reformaǵa ıligetin túri kórinbeıdi. Sondyqtan endigi mindet tym bolmaǵanda nesıe júktemesin azaıtý bolyp tur», - deıdi D. Áshimbaev.

Sarapshy reformalardyń bet-beınesine jekelegen kadrlar kóleńke túsirip úlgergenin de eske salady.

«Jemqorlyq daýlary Joǵarǵy sotqa da jetkeni esimizde. Al polıtsııany reformalaý jumystarynyń bárin Taldyqorǵan polıtsııa basqarmasynyń basshysy qyz zorlaý isine kúdikti bolýy joqqa shyǵaryp ketti. Bir jaǵynan memleket dereý áreket etkenin kórdik. Sol sátte qylmystyq is qozǵalyp, oblystyq polıtsııa basshysy jumystan qýyldy», - deıdi saıasattanýshy.

Onyń paıymynsha, aktıvterdi elge qaıtarý, ekonomıkany monopolııadan arashalaý jumystaryn sot tártibimen ǵana sheshý múmkin emes.

«Bul – saıası-quqyqtyq, ekonomıkalyq, tipti kúsh qurylymdarynyń moraldik qundylyqtarǵa negizdelgen sharalarynyń kesheni. Onyń qalaı jumys istep jatqanyn kórip otyrmyz», - deıdi Danııar Áshimbaev.

Sarapshy esirtkimen kúreste memleket ymyrasyz ustanymǵa kóshkenin atap ótken.

«Turmystyq zorlyq-zombylyq boıynsha zańnamaǵa jańashyldyqtar engizilmekshi. Qylmystyq jáne Ákimshilik kodekster qatańdatylyp jatyr. Adam quqyqtaryn qorǵaıtyn ýákilder ınstıtýty jańa baǵytta damı bastady. Bıshimbaev isi de bul máselede bir kezdegi Denıs Tenniń qazasy sııaqty polıtsııa jumysyn qaıta qurylymdaýǵa túrtki bolyp tur. Qazir polıtsııanyń qoǵamdaǵy qubylystarǵa áreket tanytý deńgeıi ósti dep oılaımyn», - deıdi ol.

Qoryta aıtsaq, Danııar Áshimbaevtyń oıynsha, Prezıdent byltyrǵy saılaýdan keıin óziniń de, memlekettik apparattyń da aldyna mańyzdy mindetter belgiledi.

«Ol mindetterdiń keıbiri oryndala bastady. Al keıbiri áli pysyqtaý satysynda. Biraq Prezıdent problemalardy túsinip qana qoımaı, sheshý joldaryn da kórip otyr. Prezıdentke qajetti aqparat jetip jatqany baıqalady. Ony ásire tsıfrlarmen aldaýsyratyp otyr dep aıta almas edim. Prezıdent ákimshiligi men arnaıy qyzmetter bul protsesti baqylap otyr», - deıdi Danııar Áshimbaev.