Prezıdenttiń Beıjińdegi baıandamasy Qytaıda áleýmettik jelilerdiń basty taqyryby bolyp tur
18 qazanda Beıjińdegi «Bir beldeý, bir jol» halyqaralyq yntymaqtastyǵynyń III forýmynyń ashylý rásimine qatysqan Qazaqstan Prezıdenti baıandamasyn qytaı tilinde bastaǵan bolatyn. Toqaevtyń vıdeosy birden Qytaıdaǵy túrli áleýmettik jelilerde taralyp, zor qoshemetpen qabyldandy.
Qytaıdyń «Weibo» platformasynda (Facebook-tiń qytaılyq nusqasy - red.) jýrnalıst Hý Sıtszın jarııalaǵan vıdeo 650 myńǵa jýyq ret qaralǵan. Jergilikti jeli qoldanýshylary Qazaqstan Prezıdentiniń qytaı tilin jetik meńgergenine tańdanys bildirip jatyr.
Biri: «Onyń qytaıshasy menikinen de jaqsy eken», - dep jazsa, endi biri: «Daýsy da qeremet», - dep pikir bildiredi.
Qasym-Jomart Toqaevtyń «Beıjiń til jáne mádenıet ýnıversıtetiniń úzdik túlegi» ekeni týraly aqparat jazǵandar da bar.
Qytaıdaǵy taǵy bir tanymal áleýmettik jeli – «toutiao.com» da Q. Toqaevtyń qytaı tilinde sóılegen vıdeosyn salyp, 5 myńnan astam pikir men 48 myńnan astam laık jınaǵan.
«Toqaevtyń sóıleý deńgeıi óte joǵary jáne ol qytaısha óte kúshti sóıleıdi! Prezıdent myrza úshin laık basamyn», - dep jazady oqyrmandardyń biri.
Taǵy bir adam: «Bul prezıdenttiń qytaısha sóıleýi ony tikeleı halyqpen jaqyndastyryp, dostyq sezimin týdyrady. Qazaqstan men Qytaıdyń dostyǵy baıandy bolsyn dep tileımin!» - dep jazdy.