Prezıdenttiń atyna Qurban aıt merekesine oraı quttyqtaý jedelhattary kelip tústi
Ózbekstan basshysy Shavkat Mırzıeev quttyqtaýynda eki el basshylarynyń saıası erik-jigeri men ortaq is-áreketiniń arqasynda halyqtar arasyndaǵy ǵasyrlar boıy jalǵasyp kele jatqan dostyq, yntymaqtastyq jáne tatý kórshilik qatynastar strategııalyq seriktestik pen odaqtastyq deńgeıine kóterilgenin atap ótken. Sondaı-aq Qasym-Jomart Toqaevtyń jaýapty memlekettik qyzmetine tabys, Qazaqstan halqyna baq-bereke tilegen.
Qyrǵyz Prezıdenti Sadyr Japarov adamzatty meıirimdilikke úndeıtin osynaý qasıetti kúnde dostas Qazaqstan halqynyń barlyq arman-nıeti oryndalýyna tilektestik bildiredi.
– Eki el arasynda qalyptasqan tyǵyz ári dostyq qarym-qatynas baýyrlas halyqtarymyzdyń ıgiligi úshin aldaǵy ýaqytta da nyǵaıa túsetinine senimdimin, - dep jazylǵan jedelhatta.
Tájikstan basshysy Emomalı Rahmon Qasym-Jomart Toqaevqa densaýlyq, zor baqyt, asa jaýapty qyzmetine tabys, Qazaqstan halqyna beıbitshilik pen turaqtylyq, baq-bereke tilegen.
– Baýyrlas halyqtarymyzdy ortaq mádenı-rýhanı qundylyqtardan, sonyń ishinde búkil musylman úmbeti úshin qasıetti sanalatyn Qurban aıt merekesinen bastaý alatyn berik dostyq qatynastar men ózara tileýlestik biriktiredi, - dep jazǵan Emomalı Rahmon.
Túrikmenstan Prezıdenti Serdar Berdimuhamedov óz quttyqtaýynda tarıhı tamyry myńjyldyqtardan bastalatyn, adamzattyń rýhanı qundylyqtaryn pash etetin qasıetti meıram barsha musylman úmbetiniń ózara túsinistigi men seniminiń nyǵaıýyna yqpal etetinin atap ótken.
Sonymen qatar Qurban aıt meıramyna oraı ózderiniń izgi tilekterin BAÁ Prezıdenti sheıh Muhammed ben Zaıd Ál Nahaıan, Mysyr Prezıdenti Ábdel Fattah Ás-Sısı, Iordanııa Koroli II Abdalla, Marokko Koroli VI Muhammed, Kýveıt Ámiri sheıh Mıshaal ál-Ahmad ál-Djaber as-Sabah, Oman Sultany Haısam ben Tarıq, Bahreın Koroli Hamad ben Isa Ál Halıfa, Palestına Prezıdenti Mahmýd Abbas, BAÁ Vıtse-prezıdenti, Premer-mınıstri, Dýbaı Ámirshisi sheıh Muhammed ben Rashıd Ál Maktým, BAÁ Vıtse-prezıdenti, Premer-mınıstrdiń orynbasary sheıh Mansýr ben Zaıd Ál Nahaıan, Ekonomıkalyq yntymaqtastyq uıymynyń Bas hatshysy Hýsrav Nozırı, Islam yntymaqtastyǵy uıymynyń Bas hatshysy Hısseın Brahım Taha jáne taǵy basqalar joldady.
Qazaqstan Prezıdentiniń atyna quttyqtaý hattary men jedelhattar áli de kelip túsip jatyr.