Prezıdenttik kadr rezerviniń múshesi: bul maǵan artylǵan senim

<p>ASTANA. KAZINFORM &ndash; Prezıdenttik jas kadrlar rezerviniń úshinshi legine ótken astanalyq Madına Ospanalyny suhbatqa shaqyryp, jas kadrlardy irikteý barysy, memlekettik qyzmettegi áıel adamdardyń róli, jeke ustanymy men maqsaty týraly áńgime órbitken edik.</p>

Madına Ospanaly — Almaty oblysynyń týmasy. Almatydaǵy J. Jabaev atyndaǵy №161 lıtseıdiń túlegi. Ál-Farabı atyndaǵy QazUÝ-di qazaq tili men ádebıeti pániniń muǵalimi mamandyǵy boıynsha meńgergen.

«Muǵalim el erteńi bolar jastarǵa tárbıe men bilim beretin tulǵa ǵoı. Meniń de oıym, bir balanyń kókiregine bilim nuryn quıa alsam, izgiliktiń dánin ege alsam, baǵyt-baǵdar bere alsam - maqsatyma jetkenim. Al memlekettik qyzmet meniń arman-maqsatym boldy dep aıta almaımyn. Elge qyzmet etý úshin memlekettik qyzmetker bolý shart emes. Dese de, múmkindik bolyp jatsa, nege istemeske?» - dedi Madına Ospanaly.

Sondaı-aq, spıker Prezıdenttik jas kadrlar rezervi qataryna qalaı qosylǵanyn aıtyp berdi.

Foto: Madına Ospanalynyń jeke muraǵaty

«Buryn memlekettiń basqarý isine aralasý úshin seniń soǵan saı júrip ótken jolyń, memlekettik qyzmette ájeptáýir tájirıbeń bolýy kerek bolatyn. Bylaısha, ol uzaq jol. Al rezerv – kópir, ıaǵnı óziniń bilimi men qarym-qabiletin kórsetip, ózin dáleldeı bilgen ozyq oıly jastarǵa berilgen múmkindik deýge bolady. Іrikteýge jasy 35-ke tolmaǵan, joǵary bilimi bar, eńbek ótili 5 jylǵa tolǵan, memlekettik tildi biletin QR azamaty qatysa alady. Іrikteý tórt aıǵa jýyq boldy, 8 kezeńnen turdy.

Qujat jınaǵan soń, memlekettik tildi bilý deńgeıin anyqtaıtyn synaqtan óttik, odan keıingi kezeńderde mátinmen, sandyq aqparatpen jumys isteı alý, sıtýatsııalyq tapsyrmalardy sheshý, quziretimizdi kórsetý, joba qorǵaý, suhbat, taǵy basqa kezeńder boldy. Jalpy irikteý týraly tolyq aqparatty rezervtiń saıtynan alýǵa bolady. Tirkelgende Qazaqstannyń memlekettik basqarý qurylymyna sáıkes alty salanyń bireýin tańdaý kerek. Meniń tańdaǵanym – áleýmettik saıasat jáne azamattyq qoǵam salasy. Meni memlekettik tildiń jaıy, bilim men ǵylym máselesi tolǵandyrady», - deıdi ol.

Jas maman Prezıdenttik kadr rezervi qatarynda bolý áserimen bólisti.

«Tizimnen aty-jónimdi kórgende qatty qýandym desem, artyq aıtqanym bolar. Menen góri ata-anam qattyraq qýanǵan sııaqty, óıtkeni ata-ana úshin balanyń tıtteı jetistiginiń ózi zor qýanysh qoı. Biraq, árıne, qanshama adamnyń ishinen 50 jas kadrdyń tizimine ilikkenime ishteı qýandym. Buny, eń aldymen, maǵan artylǵan senim dep bilemin. Al jaýapkershilikten qorqýdyń qajeti joq, eń aldymen, adamnyń óz ar-uıatynan bastalady», - dep tolyqtyrdy jas kadr.

Madına Ospanalyǵa memlekettik qyzmet salasynda jumysqa shaqyrǵan birneshe usynys túsken.

«Jas kadrlardyń qyzmetke ornalasý isin Memlekettik qyzmet isteri agenttigi uıymdastyryp jatyr. Usynylyp otyrǵan qyzmetter negizinen ózimiz tańdaǵan baǵytqa saı. Mysaly, maǵan memlekettik tildi damytý baǵytyndaǵy mekemeler men túrli bilim basqarmalarynan usynys tústi. Mınıstrlikter de shaqyrdy. Jas kadrlarǵa tańdaý erki berilip otyr. Qazir usynystardy qarastyryp jatyrmyn. Bul jerde másele usynylǵan qyzmettiń basqarý laýazymy bolý-bolmaýynda emes, meniń osy ýaqytqa deıin jıǵan bilim-tájirıbemniń qaı tusta kóbirek paıdaly bolatynynda», - deıdi jas kadr.