Prezıdenttik kadr rezervi: irikteýden ótkender kelesi kezeńde qalaı synalady

<p>7 qazanda Prezıdenttik jastar kadr rezervine irikteý aıasynda sandyq aqparatpen jumys isteý qabiletin baǵalaý boıynsha testileý ótedi. Ol úmitkerdiń kesteler, grafıkter jáne dıagrammalar túrindegi sandyq aqparatpen jumys isteý qabiletin anyqtaýǵa baǵyttalǵan 25 test tapsyrmasynan turady, dep habarlaıdy QazAqparat QR Memlekettik qyzmet isteri agenttiginiń baspasóz qyzmetine silteme jasap.&nbsp;</p>

Úmitkerlerge testileýdi tapsyrýǵa 25 mınýt ýaqyt beriledi.

Testileý barysynda qatysýshylarǵa tyıym salynady:

— aqparatty qabyldaýǵa jáne taratýǵa arnalǵan elektrondyq qurylǵylardyń kez kelgen túrin, onyń ishinde qulaqqaptardy, mobıldik quralǵylardy paıdalanýǵa;

—  bireýlermen kelissózder júrgizýge;

— tapsyrmalardy daýystap oqýǵa;

— ornynan turyp, kameraǵa kóriný aımaǵynan ketýge, kompıýtermen bir orynnan ekinshi orynǵa jyljýǵa;

— kamerany jabýǵa jáne mıkrofondy óshirýge;

— beıne/sýretke túsirý, ekrandy taratýǵa (Zoom, Teams, Webex jáne t.b.).

Testileýge jiberilgen barlyq úmitkerler 6 qazan saǵat 23:59-ǵa deıingi merzimde (Astana qalasynyń ýaqyty boıynsha) óziniń jeke kabınetinde testileýden ótý ýaqytyn tańdaýy qajet.

Bul rette úmitkerler úshin testileýge qaıta jazylý múmkindigi kózdelmegenin eskerýi tıis. Sondaı-aq qatysýshylar testileýdi qaıta tapsyra almaıdy, sondyqtan testileýge aldyn ala daıyndalý usynylady: kompıýter/noýtbýktiń bolýyn, múmkindiginshe Chrome braýzerimen, turaqty ınternet baılanysyn qamtamasyz etý, veb-kamera men mıkrofonnyń jumysyn tekserý. Test tapsyrmalaryn avtomatty túrde aýdarýdy boldyrmaý úshin testileýdi bastamas buryn braýzer usynatyn avtomatty aýdarmany óshirý kerek («Parametrler» - «tilder» - «Google aýdarmashysyn paıdalaný» - jalaýshany óshirý).

Sonymen qatar, testileýdi bastamas buryn qatysýshylar kompıýter/noýtbýktegi barlyq qosymshalar men baǵdarlamalardy jabý kerek.

Qatysýshylarǵa osy kezeńinde kesteler, grafıkter men dıagrammalary bar test tapsyrmalarynyń júktelýi úshin keminde 5 mgb/s turaqty ınternetti qajet etetinin, sondaı-aq paıdalanylatyn kompıýterde qorǵaý júıesi, aqparattyq qaýipsizdik sharalary nemese basqa shekteýler testileýge qosylýǵa kedergi bolmaıtyndyǵyn aldyn ala eskerý mańyzdy.

Eger testileýden ótý kezinde ınternet baılanysy buzylǵan jaǵdaıda, úmitkerlerge paraqshany jańartpaı nemese jappaı qaıta qosylýdy kútý usynylady.

Test tapsyrǵan kezde úmitkerlerge ústel ústi jáne mıkrokalkýlıatorlardy, qaryndash pen qaǵazdy paıdalanýǵa múmkindik beriledi.

Іrikteý tártibine sáıkes sandyq aqparatpen jumys isteý qabiletin baǵalaý qorytyndysy boıynsha kelesi kezeńge eń kóbi 500 kandıdat jiberiledi. Birneshe úmitkerdiń nátıjesi birdeı bolǵan jaǵdaıda kelesi kezeń – «Sıtýatsııalyq tapsyrmalardy sheshýge» kóbirek qatysýshylar sany jiberilýi múmkin.

Qatysýshylar úshin táýlik boıy pkrezerv.gov.kz saıtynda Jivo chaty arqyly qoldaý qyzmeti jumys isteıdi, sondaı-aq Call-ortalyqqa [phone] nómiri boıynsha júginýge bolady.