Prezıdenttik ádebı syılyq kimderge buıyrdy
Іs-sharaǵa belgili aqyndar men jazýshylar, mádenıet qaıratkerleri qatysty.
«Ádebıet — ulttyń jany. Ol árdaıym halyqpen birge úzdiksiz damyp otyrady. Shyǵarmashyl tulǵanyń qalamynan qashalyp shyqqan týyndy qaı kezde de álemdik kontekstegi ulttyń ereksheligin tanytatyny sózsiz. Hákim Abaı, Muhtar Áýezov, Qasym Amanjolov, Jumeken Nájimedenov, Muqaǵalı Maqataev syndy ádebıet alyptarynyń shyǵarmalary óz ýaqytynyń kórkemdik kókjıegin keńeıtti. Rýhanııattyń osynaý uly kóshi óz saparyn toqtatpaı, keshe men búgindi, búgin men erteńdi jalǵap keledi. Sondyqtan biz árdaıym jas qalamgerler shyǵarmashylyǵyn aıryqsha nazarda ustaımyz», — dep atap ótti mınıstr.
Sondaı-aq mınıstr memleket tarapynan elimizdiń aqyn-jazýshylarynyń týyndylaryn basyp shyǵarý arqyly olarǵa belsendi túrde qoldaý kórsetetinin aıtty. Jyl saıyn qoǵamdyq mańyzy bar kitaptardy satyp alý, basyp shyǵarý jáne taratý baǵdarlamasy boıynsha qalamgerlerdiń kitaptary jaryq kóredi. Sońǵy eki jyl ishinde úsh júzden astam jańa týyndy tól ádebıetimizdiń qoryn tolyqtyrdy. El mádenıetiniń damýyna qosylǵan qundy úles dep tanylǵan ádebıet pen óner salasyndaǵy úzdik shyǵarmalar úshin Abaı atyndaǵy Memlekettik syılyq pen «Aıboz» ulttyq ádebı syılyǵy beriledi.
2023 jyly jas qalamgerlerge memlekettik qoldaý kórsetý, daryndy aqyn-jazýshylardyń jańa býynyn qalyptastyrý maqsatynda tuńǵysh ret Prezıdenttik arnaýly ádebı syılyq taǵaıyndaldy. Ádebı syılyq 18-35 jasqa deıingi qalamgerlerge arnalǵan.
Avtorlar buǵan deıin halyqaralyq jáne ulttyq baıqaýlarǵa qatyspaǵan óz shyǵarmalaryn usynyp, barlyǵy 53 ótinim qabyldandy. Onyń ishinde «Balalar ádebıeti» nomınatsııasyna — 17, «Dramatýrgııa» nomınatsııasyna — 9, «Poezııa» nomınatsııasyna — 13, «Proza» nomınatsııasyna — 14 úmitker bar.
Ótinimderdiń barlyǵy jiti qaralyp, shyǵarmanyń kórkemdik deńgeıi arnaıy saraptamadan ótti.
Mınıstr «Qazaqstannyń jas jazýshylary men aqyndaryna arnalǵan Prezıdenttik arnaýly ádebı syılyqtyń laýreaty» ataǵynyń ıegerlerine arnaıy dıplomdar men tósbelgiler jáne aqshalaı syılyqtar tabys etti.
«Proza» nomınatsııasy boıynsha Jylqybaı Doshannyń «Kvant» týyndysy, «Poezııa» nomınatsııasy boıynsha Edilbek Dúısenovtiń «Qalalyq qustar» óleńder toptamasy, «Dramatýrgııa» nomınatsııasy boıynsha Aıtolkyn Ashımovanyń «Taý kótergen Tolaǵaı» dramalyq týyndysy, «Balalar ádebıeti» nomınatsııasy boıynsha Oljas Qasymnyń «Atyń ozsyn, azamat!» toptamasy júldeli orynǵa ıe boldy.