Prezıdenttiń Joldaýy Qytaıdyń áleýmettik jelilerinde qyzý talqyǵa tústi

NUR-SULTAN. QazAqparat - Qazaqstan Prezıdenti Qasym-Jomart Toqaevtyń halyqqa Joldaýy 16 naýryzda jarııalandy. Bul Joldaý elimizde ǵana emes, kórshiles Qytaı elinde de áleýmettik jelide kópshiliktiń nazaryn aýdaryp, talqyǵa tústi, dep habarlaıdy QazAqparat.

Qytaıdaǵy WEIBO áleýmettik jelisinde Qazaqstan Respýblıkasynyń Qytaıdaǵy Elshiligi jarııalaǵan aqparat paraqshasynda Qytaıdyń kóptegen jeli qoldanýshylary Prezıdent Toqaevtyń Joldaýyna qatysty óz pikirlerin bildirip jatyr.

Qytaılyq pikirlerdiń kópshiliginde prezıdent Toqaevtyń reformalyq sheshimderi joǵary baǵalanǵan.

Ásirese, Prezıdent Toqaevtyń joldaýyndaǵy «Búginde elimizde barlyǵy prezıdenttiń tóńireginde órbıdi, bul durys emes. Biz bul tájirıbeden birtindep bas tartýymyz kerek. Men úshin bılik pen sıtýatsııalyq yqpaldyń kez kelgen qosymsha tetikterinen góri memlekettiń uzaq merzimdi múddesi mańyzdy» degen sózi, qytaılyq jeli qoldanýshylarynyń erekshe joǵary baǵalaýyna ıe boldy.

Solardyń biri: «Qazaqstan – uly el, Demokratııanyń nury osynaý ásem jerdi jabady» dep jazsa, Taǵy bir qytaılyq jeli qoldanýshysy: «Toqaev Qazaqstan tarıhynda halyqtyq demokratııa men bostandyq jolyn ustanatyn dáýirlik tulǵaǵa aınalady» dep jazdy.

Taǵy bir qytaılyq jeli qoldanýshysy: «Bıliktegi adamǵa óz bıligin shekteý ońaı emes, al Toqaev bolashaqta Qazaqstan úshin uzaq merzimdi beıbitshilik pen turaqtylyq izdegisi keledi, ol tabysqa jetedi dep senemin» dep pikir bildirdi.

Qytaılyq jeli qoldanýshynyń bir: «Bul durys jol, Qazaqstandy jarylqasyn» dep jazdy.

Sondaı aq, WEIBO áleýmettik jelisindegi Qytaılyq jeli qoldanýshylary Qazaqstan halqyna Prezıdent Toqaevtyń reformalary aıasynda gúldengen bolashaqqa qadam basýyn tiledi.

Ázirge Qazaqstannyń Qytaıdaǵy elshiliginiń Weibo jelisinde jarııalanǵan aqparat jazbany 1200-den astam adam bólisip, 600-den astam adam pikir qaldyrǵan, 15 myńnan astam laık jınaǵan.