Prezıdenttiń «Jastar jylyn» jarııalaý týraly usynysynyń máni tereń - Ǵabıt Tursynbaı

TALDYQORǴAN.QazAqparat - Qazaqstan halqy Assambleıasynyń Almaty oblysy boıynsha ókildigi tóraǵasynyń orynbasary Ǵabıt Tursynbaı Prezıdenttiń Qazaqstan halqyna joldaǵan Joldaýyna óz pikirin bildirdi. Hatshylyq meńgerýshiniń pikirinshe, Nursultan Nazarbaev keler jyldy «Jastar jyly» dep usynýynyń máni tereńde jatyr, - dep habarlaıdy QazAqparat tilshisi. 

«Búgingi jastar erteńgi eldiń, jerdiń ıeleri. Sondyqtan Elbasymyz keler jyldy «Jastar jyly» dep jarııalaýdy usynýy bekerden beker emes. Táýelsizdik jylynda dúnıege kelgen, jańasha oılaıtyn urpaq osy elge-jerge ıelik etýde urpaqtar sabaqtastyǵyn umytpaý kerek. Biz elimizdi, jerimizdi osy jastarǵa senip tapsyramyz, sebebi jastar bizdiń bolashaǵymyz. Sol sebepti bul máseleni tereńnen qozǵap, kóterip otyr», - dedi Ǵ.Tursynbaı.

Demek, Qazaqstan halqy Assambleıasynyń Almaty oblysy boıynsha ókildigi tóraǵasynyń orynbasary bul baǵyt boıynsha birinshi kezekte jastardyń patrıottyq sezimin, elge-jerge degen súıispenshiligin arttyrý kerek dep esepteıdi.

«Sebebi jaqsy bilim alýǵa bolady. Bilimdi jan-jaqty, birneshe tildi úırenýge bolady. Biraq týǵan eldiń, jerdiń patrıoty bolmaıynsha óziniń eline, jerine qyzmet ete almaıdy. Tek jeke basynyń múddesi úshin ǵana qyzmet etetin adamdar bolýy múmkin. Bizge osy memleketimizdi, táýelsizdigimizdi baıandy etetin, uly dalanyń salt-dástúrin jalǵastyryp, keleshek urpaqqa jetkizetin elim, jerim degen jastar qajet. Jastarmen osy baǵytta jumys isteý kerek dep sanaımyn», - deıdi Qazaqstan halqy Assambleıasynyń Almaty oblystyq ókildigi tóraǵasynyń orynbasary Ǵabıt Tursynbaı.

Aıta ketsek, búgin Aqordada QR Prezıdenti Nursultan Nazarbaev Qazaqstan halqyna arnaǵan dástúrli Joldaýyn jarııalady. Strategııalyq qujat elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan.