Prezıdenttiń tóraǵalyǵymen halyqty áleýmettik qorǵaý máseleleri jóninde keńes ótti
Jıynǵa Premer-Mınıstr Asqar Mamın, Prezıdent Ákimshiliginiń Basshysy Baqytjan Saǵyntaev, Ulttyq bank tóraǵasy Erbolat Dosaev, Premer-Mınıstrdiń birinshi orynbasary - Qarjy mınıstri Álıhan Smaıylov, Premer-Mınıstrdiń orynbasary Gúlshara Ábdiqalyqova, Prezıdent Ákimshiligi Basshysynyń birinshi orynbasary Darhan Káletaev, Prezıdenttiń ekonomıkalyq máseleler jónindegi kómekshisi Tımýr Súleımenov, Eńbek jáne áleýmettik qorǵaý mınıstri Berdibek Saparbaev qatysty.
Qasym-Jomart Toqaev ádiletti áleýmettik saıasattyń aıryqsha mańyzy, ásirese, aýyr jaǵdaıǵa tap bolǵan adamdarmen qatynasty qalyptastyrýda ekenin atap ótti. Sondaı-aq, Qazaqstan Prezıdenti tsıfrlyq platformany qoldana otyryp, biryńǵaı áleýmettik kartany keshiktirmeı engizý qajettigin aıtty.
Keńes barysynda Eńbek jáne áleýmettik qorǵaý mınıstriniń ataýly áleýmettik kómek kórsetý jaǵdaılary jónindegi esebi tyńdaldy.
- Osy mańyzdy salada halyqtyń jaǵdaıyn jaqsartýǵa múmkindik beretin aýqymdy jumystar júrgizilýde. Sonymen qatar, ataýly áleýmettik kómek kórsetý sharalary kezinde zań buzýshylyqtar, tipti, alaıaqtyq joldar da anyqtaldy. Bul bıýdjet úshin josparlanbaǵan shyǵyn, - dep baıandady Berdibek Saparbaev.
Jıyn qorytyndysy boıynsha Memleket basshysy atalǵan saladaǵy teris áreketterdi joıý úshin Eńbek jáne áleýmettik qorǵaý mınıstrine ataýly áleýmettik kómektiń berilý tártibin retteý jóninde shuǵyl sharalar qabyldaýdy tapsyrdy, sondaı-aq, Prezıdent Ákimshiligi men Úkimetke birqatar naqty tapsyrma berdi.