Prezıdenttiń tehnıkalyq jáne kásibı bilim berýge qatysty tapsyrmalary oryndaldy

NUR-SULTAN. QazAqparat – Prezıdenttiń baspasóz hatshysy Berik Ýálı Facebook-tegi paraqshasyna Qasym-Jomart Toqaevtyń Ulttyq keńes alańynda aıtqan tapsyrmalarynyń taǵy bir parasy iske asqanyn jazdy, dep habarlaıdy QazAqparat tilshisi.

Ol Memleket basshysynyń Ulttyq qoǵamdyq senim keńeste tehnıkalyq jáne kásibı bilim berýdi belsendi damytý tapsyrma berilgenin eske saldy.

«Tehnıkalyq jáne kásibı bilim berýdi belsendi damytý kerek. «Jas maman» jobasynyń aıasynda biz 180 kolledjdiń materıaldyq-tehnıkalyq bazasyn jańartamyz. Tegin kásibı tehnıkalyq bilim berý baǵdarlamasy jyl saıyn 100 myń stýdentti qamtyp otyr», - dep málim etken Prezıdent.

Tehnıkalyq jáne kásibı bilim berýge qatysty birqatar tapsyrma oryndaldy.

«- 2020 jyldan bastap «Jas maman» jobasy júzege asyrylyp jatyr;

- Jalpy somasy 22,1 mıllıard teńgege 80 kolledj zamanaýı quraldarmen jabdyqtaldy;

- 2021 jyly 100 kolledjdiń oqý-óndiris sheberhanalaryn jabdyqtaý úshin 28,9 mıllıard teńge bólý josparlanyp otyr;

- Kolledjder kadr daıyndaý isine halyqaralyq tájirıbelerdi óndirip, óz salalary boıynsha biliktilik ortalyqtaryna aınalýy qajet», delingen habarlamada.