PREZIDENTTІŃ TAPSYRMASYN ORYNDAÝDAǴY ÚKІMETTІŃ SÁTSІZDІKTERІ: Qoljetimdi baspana qurylysy boıynsha memlekettik baǵdarlama jumys isteı almaı otyr - depýtat A. Soloveva

ASTANA. 4 qarasha. QazAqparat - Memlekettik baǵdarlama aıasynda qoljetimdi baspana qurylysy boıynsha ahýal jaqsarǵandyǵy týraly Úkimettiń sendirýine qaramastan, shyn máninde bul baǵyttaǵy jaǵdaı nasharlady.

Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR Parlamenti Májilisiniń depýtaty Aıgúl Soloveva málim etti.

«QR Óńirlik damý mınıstrligi bizge eki márte kelip, jaǵdaı ońtaılandyrylyp, jaqsarǵandyǵy jóninde baıandady. Degenmen de, qazirgi kezde ózimizdiń saılaýshylarmen kezdesý kezinde osy baǵyttaǵy synnyń arta túskenin kórip otyrmyz»,-dedi depýtat.

Osy oraıda A. Soloveva depýtattarǵa kelip túsetin pikirler men hattarǵa súıene otyryp qoljetimdi baspana qurylysy boıynsha memlekettik baǵdarlama shyn máninde jumys istemeı otyrǵandyǵyn sóz etti.

Onyń paıymynsha, baspana qurylysynda qandaı da bir qadamdar bolǵanymen olar aıtarlyqtaı tıimdi bolǵan joq, sondaı-aq osy qoljetimdi úıdi alýǵa nıettiler osy jeńildikterdi sezingen joq.

Esterińizge sala keteıik, 11 qazandaǵy Úkimettiń keńeıtilgen otyrysynda Memleket basshysy «Qoljetimdi baspana-2020» baǵdarlamasyn júzege asyrý kóp renish týdyryp otyrǵanyna toqtalyp ótken edi. Tólem qabiletiniń kemdigine baılanysty oǵan kóptegen otbasylar qatysa almaýda.

Sonymen qatar, Qazaqstan Prezıdenti «Turǵynúıqurylysjınaqbankiniń» basshylary men olardyń týystarynyń Baǵdarlama aıasynda jeńildik qarastyrylǵan baǵamen páter alý faktilerine de nazar aýdarǵan bolatyn.