Prezıdenttiń saıası bastamalaryn saýalnamaǵa qatysqandardyń 82,4% qoldady

NUR-SULTAN. QazAqparat – Saýalnamaǵa qatysqan respondentterdiń 82,4% Prezıdent Qasym-Jomart Toqaevtyń saıası bastamalaryn qoldaıdy, dep habarlaıdy QazAqparat.

Qoǵamdyq saıasat ınstıtýty osy jyly 7 qyrkúıekte telefon arqyly saýalnama júrgizdi. Nur-Sultan, Almaty, Shymkent qalalary men 17 oblystyń qala jáne aýyl turǵyndary arasynda 18 jastan asqan 2394 respondentten saýalnama alyndy.

Zertteý nátıjeleri Memleket basshysynyń Qazaqstan halqyna Joldaýynda kóterilgen saıası bastamalardy halyqtyń oń qabyldaǵanyn kórsetti.

Esterińizge sala keteıik, Memleket basshysy Qasym-Jomart Toqaev 2022 jylǵy 1 qyrkúıektegi Qazaqstan halqyna Joldaýynda Prezıdenttiń ókilettik merziminiń sany men uzaqtyǵyn qaıta qaraýdy usynǵan bolatyn. Atap aıtqanda, Prezıdenttiń mandatyn ekinshi ret qaıta saılaný quqyǵynsyz 7 jylǵa sozylatyn tek bir merzimmen shekteý týraly bastama kóterildi.

Suralǵandardyń basym kópshiligi (82,4%) bul saıası jańashyldyqty qoldaıdy.

Bul bastamany qoldaıtyndar negizinen mynadaı dálel keltiredi:

- 7 jyl ishinde kez-kelgen saılaýaldy baǵdarlamany júzege asyrýǵa bolady (61,7%);

- 7 jyl ishinde bıliktiń barlyq qurylymdaryn monopolııalap alý múmkin emes (14,9%).

Sondaı-aq árbir 5-shi respondent úshin (19,5%) eń basty másele - Prezıdenttiń tek bir ret qana saılanatyny.