Prezıdenttiń Májilis depýtattarynyń kezekten tys saılaýyn taǵaıyndaýǵa baılanysty úndeýin qoldaımyz - Á. Qusaıynov

ASTANA. Qazaqparat - Elbasynyń Májilis depýtattarynyń kezekten tys saılaýyn taǵaıyndaý týraly Jarlyǵyn biz tolyqtaı qoldaımyz. Bul týraly búgin Ortalyq kommýnıkatsııalyq qyzmetindegi baspasóz máslıhatynda QR Kásipodaqtary federatsııasynyń tóraǵasy Ábilǵazy Qusaıynov málim etti.

«Barsha álemde daǵdarys qanat jaıyp jatyr. Sonymen qatar, saıası máseleler boıynsha keıbir memleketterdegi jaǵdaılar da qosymsha qıyndyqtardy týyndatýda. Keshegi Elbasynyń Jarlyǵyn biz tolyqtaı qoldaımyz. Bir apta boıy suhbattar jasap, pikir almasýlar júrgizdik. Sonymen qatar osy saılaýǵa qatysty Memleket basshysy keshe jasaǵan úndeýinde barlyq máselelerdi egjeı-tegjeıli túsindirip jetkizdi»,-dep toqtaldy Á. Qusaıynov.

Osy oraıda Kásipodaqtar federatsııasynyń tóraǵasy eń bastysy búgingi ahýaldy eskere otyryp, ár salada saýatty ári elimizdiń múddesine berilgen kandıdattar Májiliske kelýi kerek ekenin atap ótti.

«Sondyqtan saıası partııalar qazirgi jaǵdaıdy túsine otyryp, óte durys bastama kóterdi»,-dedi ol.

Budan buryn habarlanǵandaı, ótken aptada Májilis depýtattary QR Prezıdentine Májilisti merziminen buryn taratý jáne kezekten tys saılaý taǵaıyndaý týraly Jarlyǵyn qabyldaý týraly bastamamen júgindi.

Esterińizge sala keteıik, keshe Elbasy Nursultan Nazarbaev besinshi shaqyrylǵan Qazaqstan Respýblıkasy Parlamentiniń Májilisin taratý jáne Qazaqstan Respýblıkasy Parlamenti Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıdy.