Prezıdenttiń Qytaıǵa sapary boıynsha kóptegen birlesken jobany qolǵa alamyz - QSZI sarapshysy

ASTANA. QazAqparat – Qytaı ekonomıkany ártaraptandyrýdaǵy bizdiń basty seriktesterimizdiń biri bolmaq. Memleket basshysynyń Qytaı Halyq Respýblıkasyna memlekettik saparyna qatysty pikir bildirgen QR Prezıdenti janyndaǵy Qazaqstan strategııalyq zertteýler ınstıtýtynyń dırektory Erkin Tuqymov osyndaı oı aıtty, dep habarlaıdy QazAqparat tilshisi.

«Bul sapar – dıplomatııalyq qatym-qatynas ıerarhııasy boıynsha eń joǵary deńgeıdegi memlekettik sapar. Ol bizdiń ınvestıtsııalar, saýda, damý jónindegi strategııalyq qatynastarymyzdyń ilgerileý turǵysynan asa mańyzdy bolary anyq», - dedi Erkin Tuqymov QazAqparat tilshisiniń saýalyna jaýap bere otyryp.

Sonymen qatar, sarapshy qazir elimiz ekonomıkany ártaraptandyrý kezeńinde turǵanyn eskerý qajet ekenin aıtty.

«Qytaı bul baǵyttaǵy jumystardy iske asyrý boıynsha Qazaqstannyń basty seriktesteriniń birine aınalýy múmkin. Búgingi tańda Qytaı – álemdegi eń úlken naryq. Oǵan kirý úshin joǵary básekelestik júrip jatyr. Kórshi memleketterdi eskere otyryp, biz bul múmkindikti tolyǵymen paıdalanýymyz kerek. Bul biz úshin Qytaı ınvestıtsııalaryn tartýǵa jáne tranzıtti damytýǵa yqpal etedi», - dep atap ótti Erkin Tuqymov.

Sarapshy atap ótkendeı, 30 kúndik vızasyz rejım ornatý týraly kelisim – elimizdiń geografııalyq artyqshylyǵyn paıdalana otyryp, týrısterdi tartý úshin jaqsy múmkindik.

«Jyl saıyn álem elderin aralaıtyn 200 mln qytaılyq týrıstiń bizge az ǵana bóligi keledi. Al, týrıstik sala árdaıym mýltıplıkatıvti áser beredi. Ol ınfraqurylymdy, tamaq ónerkásibin damytýǵa jáne «Túrkistan-Tashkent-Samarqand-Almaty» týrıstik marshrýty boıynsha basqa eldermen kelisim jasasýǵa yqpal ete alady», - deıdi Erkin Tuqymov.

Sarapshynyń aıtýynsha, memlekettik sapar kóptegen strategııalyq mindetterdi sheshýge múmkindik beredi.

«Meniń oıymsha, sapar qorytyndysy negizinde biz ekonomıka jáne ınvestıtsııa boıynsha kóptegen birlesken jobalardy qolǵa alamyz», - dep túıindedi Erkin Tuqymov.