Prezıdenttiń konstıtýtsııalyq mártebesi memlekettiń ınstıtýttaryn nyǵaıtýǵa yqpal etti – Marat Beketaev

NUR-SULTAN. QazAqparat – Prezıdenttik bılikti ınstıtýtsııalaý - Qazaqstandy demokratııalyq, quqyqtyq jáne áleýmettik memleket retinde ornyqtyrýda oń ról atqardy. Bul týraly Qazaqstanda prezıdenttik ınstıtýttyń engizilgenine 30 jyl tolýyna oraı onlaın rejımdegi halyqaralyq ǵylymı-tájirıbelik konferentsııada QR Ádilet mınıstri Marat Beketaev málim etti, dep habarlaıdy QazAqparat tilshisi.

«Búgin biz Prezıdent laýazymyn belgileýdiń tarıhı mańyzdylyǵyna taldaý júrgizý, Prezıdent ınstıtýtynyń negizgi damý satylaryn, sondaı-aq saıası turaqtylyqty qamtamasyz etýdegi onyń rólin jańǵyrtý tóńireginde pikir almasý úshin jınalyp otyrmyz. 1990 jylǵy 24 sáýirde «Qazaq SSR Prezıdenti laýazymyn belgileý jáne Qazaq SSR Konstıtýtsııasyna ózgerister men tolyqtyrýlar engizý týraly» Zańdy qabyldaý Qazaqstannyń memlekettik qurylysyndaǵy erekshe kezeń boldy. Qazaqstan tarıhynyń sol bir jaýapty kezeńinde Tuńǵysh Prezıdent bolyp Nursultan Ábishuly Nazarbaevtyń saılanýy - jańa qazaqstandyq memlekettiliktiń, onyń saıası-quqyqtyq jáne ekonomıkalyq negizderiniń qalyptasýynda aýqymdy tarıhı ról atqardy. Kóbine dál osy tulǵanyń jeke erik-jiger qasıetteriniń arqasynda elimizde Prezıdent ınstıtýty laýazymynyń belgilenýi oryn aldy», - dedi M. Beketaev.

Onyń paıymynsha, bul prezıdenttik bılikti ınstıtýtsııalaý men Konstıtýtsııanyń 1-babynyń 1-tarmaǵyna sáıkes, Qazaqstandy demokratııalyq, zaıyrly, quqyqtyq jáne áleýmettik memleket retinde ornyqtyrýda oń ról atqardy.

«Atalǵan ınstıtýttyń arqasynda Konstıtýtsııa qabyldanyp, quqyqtyq baza qalyptasty, sondaı-aq áleýmettik-ekonomıkalyq damýdyń aýqymdyq baǵdarlamalary iske asyryldy», - dedi Marat Beketaev.

Onyń sózine qaraǵanda, Memleket basshysynyń konstıtýtsııalyq mártebesi egemen memlekettiń ınstıtýttaryn ary qaraı nyǵaıtýǵa, halyqaralyq beldiń artýyna jáne quqyq qaǵıdasynda qazaqstandyq memlekettiliktiń turaqty negizderin qalyptastyrýǵa yqpal etti.