Prezıdenttiń kezekten tys saılaýy - saıası, áleýmettik, tarıhı mańyzy zor oqıǵa - Ulyqbek Esdáýlet
Onyń aıtýynsha, Prezıdenttiń kezekten tys saılaýy - ýaqyt talabynan týǵan saıası, áleýmettik, tarıhı mańyzdy bar sheshim.
«Prezıdent Qasym-Jomart Toqaev 9 maýsymda búkil halyqtyq Prezıdent Saılaýy ótetinin málimdedi. Bul shynynda da óte mańyzdy saıası, áleýmettik, tarıhı mańyzy bar qajetti is dep oılaımyz. Sebebi, ár nársege aıqyndyq kerek. Memlekette bılik almasqan kezde ýaqytsha basqarý da tarıhı qajettilikten týǵan. Al endi búkilhalyqtyq zańdy saılaý ótkizý, zańdy prezıdent saılap alýdyń dál osy jerde tarıhı máni bar. Bizdiń Qazaqstan osy jyldar ishinde ekonomıka, saıası, mádenı, órkenıet jaǵynan úlken jetistikterge jetken bolsa, ony ary qaraı damytý, belgilengen mejelerge jetkizý de alda turǵan mindet.
Soǵan elimizdiń damýyn ushtastyryp úlken bıikterge qol jetkizýge kózdelgen maqsat-murattar bar. Osy oraıda saılaý úlken ról atqaratynyn baıqaımyz», - dedi Basqarma tóraǵasy Ulyqbek Esdáýlet.
Belgili aqyn Qazaqstan ishki turaqtylyǵy kórshilerdiń, búkil álemniń tańdanysyn týǵyzyp otyrǵanyn aıtty.
«Syrtqy saıasatta da Qazaqstannyń bedeli jyldan jylǵa ósip keledi. Ozyq eldermen terezesi teń úzeńgiles jaǵdaılarǵa jettik. Bul saılaýdyń demokratııalyq, ádil, taza, ótýine men ózim kepil bolamyn degen prezıdent sózi kókeıime qondy. Bul degenimiz, altaý ala bolsa, aýyzdaǵy ketedi, tórteý túgel bolsa, tóbedegi keledi degen qazaqtyń maqalyn keltirip otyryp aıtqanda, halyqtyń jaǵdaıyn oılap otyrǵany da kórinip tur. El birligi, yntymaǵy buzylmasyn degen oılarǵa qosylmaıtyn adam joq. Qalamgerler qashanda halyqtyń, eldiń tutastyǵyn oılaıtyn halyq. Saıası partııalar eldi jik-jik, jan-jaqqa bólip jibermeıtin shyǵar dep oılaımyz. Olardyń da taıanyshy tiregi, halyq.
Partııalardyń ózin bir jeńnen qol, bir jaǵadan bas shyǵaryp, aýyzbirshilikte bolǵanyn qalaımyz árıne.
Osy saılaý bizdiń elimizdegi demokratııalyq qandaı deńgeıde ekenin jalpaq álemge tanytady ǵoı degen oıdamyz. Qalaı bolǵanda da bizdiń halyq óziniń órkenıetti joldaǵy el ekenin osy saılaýda bir kórsetetin shyǵar», - dedi ol.
Aıta ketý kerek, búgin Aqordada Memleket basshysy Qasym-Jomart Toqaev Qazaqstan Respýblıkasy Prezıdentiniń kezekten tys saılaýyn taǵaıyndaý týraly Jarlyǵyn jarııa etti.
Jarlyqqa sáıkes, Qazaqstan Respýblıkasy Prezıdentiniń kezekten tys saılaýy 2019 jyldyń 9 maýsymynda ótetin boldy.
Óz sózinde Qasym-Jomart Toqaev saılaýdyń ashyq, ádil ótetinine ózi kepildik beretinin aıtty.
«Qazaqstan - demokratııalyq memleket. Prezıdent halyqtyń tańdaýymen saılanady. Men, Memleket basshysy retinde, saılaýdyń taza, ashyq ári ádil ótýine kepildik beremin! Bul - meniń berik ustanymym! Aldymyzda zor mindetter tur. Men halqymyzǵa, ıaǵnı Sizderge senemin», - dedi Qasym-Jomart Toqaev.