Prezıdenttiń keńesshisi teńgeni tsıfrlandyrýdy usyndy

NUR-SULTAN. QazAqparat - Mundaı jańashyldyq kirpish alýǵa qansha qarjy ketkenin, adamdardyń jalaqysyna qansha jumsalǵanyn anyqtaýǵa kómektesedi. Prezıdenttiń keńesshisi Baǵdat Mýsın sybaılas jemqorlyqqa qarsy arnaıy qural qurylsa, adamdardyń zańǵa sáıkes jumys istep, moıynsynýdan basqa amaly qalmaıtynyn aıtty, dep habarlaıdy QazAqparat tilshisi.

« Men protsesterdi tsıfrlandyrý týraly ǵana oılamaımyn. Mysaly, memlekettik satyp alý kezinde aqshany qolma-qol shyǵarý alý máselesi bar. Memlekettik satyp alýdy utyp alǵannan keıin ony aqshaǵa aınaldyrý kerek. Munyń bári aldyn alý maqsatynda tsıfrlyq baqylaý ornatpaýdan bolyp otyr. Ony aqshaǵa aınaldyrǵannan keıin baryp anyq-qanyǵyn bilemiz. Meniń ıdeıam boıynsha teńgeniń tsıfrlyq analogy bolýy kerek jáne ol boıalǵan bolýy qajet», - deıdi Mýsın Sybaılas jemqorlyqqa qarsy agenttikte ótken brıfıngide.

Onyń aıtýynsha, mysaly, kópir qurylysyna 3 mlrd teńge bólinse, ár teńge tsıfrlandyrylǵandyqtan, ol monıtor júıesinde kórinip turatyn bolady.

«Buǵan ýaqyt kerek. Bul bıtkoın analogy, biraq bıtkoınniń ózi emes. Ekeýin shatastyrýǵa bolmaıdy. Ony bıtkoın sııaqty júzege asyrý qıyn emes. Bıtkoınniń tehnologııasy jaqsy, biz onyń paıdalysyn ǵana alýymyz kerek», - deıdi Prezıdent keńesshisi.

Onyń aıtýynsha, sybaılas jemqorlyqqa qarsy mundaı qural qurylǵan jaǵdaıda kóptegen jemqorlyq faktileriniń aldyn alýǵa bolady.

«Adamdar zań boıynsha jumys isteý kerek ekenin túsinýi kerek. Munyń bárin 2-3 jylda júzege asyrýǵa bolady. 1 jylda iske asyrýǵa bolatyn ońaıyraq tásil bar. Ekinshi deńgeıli banktermen, Ulttyq bankpen sóılesý kerek. Bul birden bolady dep aıtý qıyn, biraq tsıfrlandyrý jumys tártibinde tur, sondyqtan ony nege qazirden bastap qolǵa almasqa?», - deıdi Baǵdat Mýsın.