Prezıdenttiń Qazaqstan halqyna Joldaýy - jyldyń eń mańyzdy saıası oqıǵasy bolyp tabylady - B.Qaıypova
Bul pikirin búgin QazAqparat tilshisine bergen suhbatynda Qazaqstan Respýblıkasy Tuńǵysh Prezıdenti murajaıy dırektorynyń orynbasary Botagóz Qaıypova bildirdi.
B.Qaıypovanyń pikirinshe, Elbasynyń el halqyna joldaǵan «Jańa onjyldyq - jańa ekonomıkalyq órleý - Qazaqstannyń jańa múmkindikteri» atty Joldaýy, eń aldymen, damýdyń uzaq merzimdi basymdyqtaryn jáne eń bastysy - elimizdiń daǵdarystan keıingi kezeńdegi mıssııasyn aıqyndaıdy. Al aldaǵy on jyldyqta atqarylatyn is-sharalar, el resýrstarynyń naqty álýeti men ınnovatsııalyq tehnologııalardy endirýdegi zamanaýı qajettilikterge negizdelgen.
«Osy turǵydan alǵanda, ındýstrııalandyrý strategııasy daǵdarystan keıingi jańarý men ósýdiń ózindik «lokomotıvine» aınalýǵa tıis.Prezıdent qoǵamdy tolǵandyryp otyrǵan stýdenttik shákirtaqy men bıýdjet salasy qyzmetkerleriniń jalaqysyn kóbeıtý, Áleýmettik óndiristik korporatsııalardyń mártebesi, ǵylymnyń jaı-kúıi, halyqty jumyspen qamtamasyz etý jáne basqa da suraqtarǵa meılinshe tolyq jaýap berdi. Jańa óńirlik saıasattyń baǵyttary naqty jarııa etildi. «Nur Otan» halyqtyq-demokratııalyq partııasy men azamattyq qoǵam aldyna qoıǵan mindetter de, tutastaı alǵanda, elimizdiń saıası damýyna jańa serpin bererine senimim mol», - dep atap ótti ol.
B.Qaıypovanyń aıtýynsha, daǵdarysty eńserý úshin barlyq qoǵamdy toptastyrýǵa shaqyrǵan byltyrǵy Joldaý sekildi, Memleket basshysy 2010 jylǵy Joldaýynda da, Qazaqstan halqynyń birligi men barlyq resýrstardy jumyldyrý mindeti - biz úshin basty maqsat ekendigin aıqyndap berdi jáne onyń pikirinshe, eldiń ıdeologııasy da osynda jatyr.
«Osy rette, Elbasynyń Joldaýyna qatysty myna úsh máseleni atap ótkim keledi. Dástúr boıynsha Joldaý - QR Tuńǵysh Prezıdentiniń júrgizip otyrǵan saıasatynyń sabaqtastyǵy men júıeliligin beıneleıdi. Birtutas memlekettik strategııanyń osyndaı sabaqtastyqta jáne shyǵarmashylyqta damýy - ornyqty damý jolymen alǵa qaraı senimdi qadam basyp kele jatqan qoǵamnyń sıpattamasy. Al onyń áleýmettik baǵyttylyǵy - Prezıdenttiń qazaqstandyqtardyń ómir súrý deńgeıiniń sapasyn arttyrý men adam kapıtalyn damytýda naqty belgilengen strategııany ustanýynda. Úshinshiden, Memleket basshysynyń Joldaýy bolashaqqa senim uıalatady. N.Nazarbaev kóptegen máseleler sheshilgendigin jáne birqatar jetistikterge qol jetkizgenimizdi alǵa tarta otyryp, alda eńserýge bolatyn qıyndyqtardyń áli bar ekendigin jasyrmady. Meniń oıymsha, bul - básekelestikti arttyrýǵa baǵyttalǵan qoǵam damýynyń qalypty jaǵdaıy», - deıdi ol.