Prezıdenttiń kadr rezervine Mańǵystaýdan 5 maman ótti
Jalpy, elimiz boıynsha 13 myńnan astam jas qatysýǵa ótinim bergen bolatyn. Aqtyq kezeńge 330 maman iriktelgen. Ulttyq komıssııa otyrysynyń qorytyndysy boıynsha 300 úmitker Prezıdenttik jastar kadr rezervine alyndy.
28 jastaǵy Máýlen Ǵabdýlqalıev - úzdik 300 jastyń qataryna engen 5 mańǵystaýlyqtyń biri. Ol qazirgi tańda «Qazposhta» AQ oblystyq fılıalynda dırektor orynbasary qyzmetin atqarady. Almatydan joǵary oqý ornyn támamdap, memlekettik qyzmette, bıznes salasynda eńbek etken. 6 synnan súrinbeı ótip, úzdik 300 jastyń qataryna engen. Maqsaty - eldiń damýyna úles qosý, abyroıly qyzmet atqarý.
«Meniń negizgi tańdaǵan baǵytym - ekonomıka jáne qarjy saıasaty. Men qorǵaǵaǵan prezentatsııa ulttyq valıýtany transformatsııalaýdy kózdeıdi. Ózimniń baǵytyma qaraı mınıstrlikte jumys isteý nemese qyzmetimdi «Qazposhtada» jalǵastyrýdy oılap otyrmyn»,-deıdi Máýlen Ǵabdýlqalıev.
«Bizdiń óńirimizden 200-ge jýyq jas úmitker boldy. Ońaı bolǵan joq. Olar el basqarý salasynda qyzmet etetindikten árbir mamannyń áleýetin, bilimin, quzyretin tekserdi. 5 úmitker márege deıin jetti. Onyń ishinde bireýi - memlekettik qyzmetshi, qalǵany - bıznes ókilderi. 2019 jyldyń 20 jeltoqsan kúni Prezıdenttiń jarlyǵymen tolyqtyrý engizildi. Ol boıynsha Prezıdent rezervine engen mamandar konkýrstan tys A jáne V korpýsyna basshylyq laýazymdarǵa taǵaıyndalady»,-deıdi QR Memlekettik qyzmet isteri agenttiginiń oblystyq departamentiniń basshysy Nurgúl Jannazarova.
Rezervshiler tizimine jeke sektordan - 102, kvazımemlekettik sektordan - 98 adam jáne 96 memlekettik qyzmetshi kirdi. Úmitkerlerdiń 57%-ynyń aldyńǵy qatarly sheteldik bilimi bar, 43% - qazaqstandyq joǵary oqý oryndarynyń túlekteri. Іrikteý jeńimpazdarynyń orta jasy - 31.