Prezıdenttiń kadr rezervi: Eń jas kandıdat 24 jasta

NUR-SULTAN. QazAqparat - QR Prezıdenti janyndaǵy Qazaqstan strategııalyq zertteýler ınstıtýty dırektorynyń keńesshisi Madına Nurǵalıeva Prezıdenttik jastar kadr rezervi týraly pikir bildirdi, dep habarlaıdy QazAqparat tilshisi.

«Prezıdenttiń jastar kadr rezervi bolashaǵynan zor úmit kúttiretin 300 jas qazaqstandyqty iriktep alýǵa múmkindik berdi. Qazir álem boıynsha saıası elıtany jańartý qajettiligi bar. Osy turǵydan alǵanda, bul joba zaman talabyna saı», - deıdi Madına Nurǵalıeva.

Ol irikteýden ótken 300 adam úlken saıası laýazymǵa ıe bolýy múmkin ekenin aıtty.

«Olar - bolashaq mınıstrler men onyń orynbasarlary, oblys ákimderi, qala ákimderi, komıtettiń jaýapty hatshylary jáne basqa da qyzmetterge úmitker. Osy jobaǵa deıin atalǵan laýazymǵa ıe bolǵysy kelgen adam barlyq satydan ótip, qyryq bes jastan asqan soń ǵana basshy bola alatyn. Al bul joba jastardyń úlken laýazymda qyzmet etip, qoǵamǵa ózgeris ákelýine múmkindik beredi. Bul jobaǵa 35 jasqa deıingi mamandar qatyssa, irikteýden ótkenderdiń ortasha jasy - 31-de. Eń jas kandıdat 24 jasta», - deıdi ol.