Prezıdenttiń Germanııaǵa sapary ekonomıkalyq baılanysty damytýǵa serpin beredi - sarapshy

NUR-SULTAN. QazAqparat – Prezıdent Qasym-Jomart Toqaevtyń Germanııaǵa sapary ekonomıkalyq saladaǵy ekijaqty qarym-qatynasty damytýǵa serpin beredi. Bul pikirdi Ortalyq Azııadaǵy Germanııa ekonomıkasy ókildiginiń jobalyq menedjeri Ásel Turysbekova aıtty, dep habarlaıdy QazAqparat.

«Bul sapar aıasynda eń aldymen biz Germanııa bıznesiniń mańyzdy seriktesteriniń biri ekenimizdi jáne seriktes bolyp qala beretinimizdi eske saldyq», - deıdi Ásel Turysbekova.

Sonymen birge, sarapshy Germanııanyń Qazaqstanǵa kóptegen ınnovatsııalyq tehnologııalyq ıdeıalar ákelgenin atap ótti.

«Qazaqstanda belsendi qoldanylatyn kóptegen ınnovatsııalyq ıdeıalardy Germanııa ákelgenin umytpaý kerek. Bir ǵana Qaraǵandyda úshten astam zaýyt bar. Jańa tehnologııalardyń arqasynda sapaly buıymdardy qoldana alamyz. Bizdiń naryqta 15 jyldan beri jumys istep kele jatqan 200-den astam nemis kompanııasy bar. Meniń oıymsha, bul sapar Germanııaǵa bizdiń elimizde belsendi jumys isteıtin nemis bıznesi bar ekenin jáne basqa da nemis bıznesine daıyn ekenimizdi eske saldy. Ásirese, sońǵy eki jylda jańartylatyn energetıkalyq jobalar tanymal boldy. Sózsiz, Memleket basshysynyń Germanııaǵa sapary ekijaqty qatynastardyń, onyń ishinde ekonomıkalyq salanyń damýyna jańa serpin beredi», - dedi Ásel Turysbekova.