Prezıdenttiń ǵalymdarǵa laıyqty jalaqy tóleý máselesin kótergeni qýantty - rektor Shaımardanov

ÓSKEMEN. QazAqparat – D.Serikbaev atyndaǵy Shyǵys Qazaqstan tehnıkalyq ýnıversıtetiniń rektory Jasulan Shaımardanov Prezıdent Qasym-Jomart Toqaevtyń «Halyq birligi jáne júıeli reformalar – el órkendeýiniń berik negizi» atty halyqqa Joldaýyna qatysty pikir bildirdi, dep habarlaıdy QazAqparat tilshisi.

«Memleket basshysy Qazaqstan halqyna Joldaýynda ómirdiń barlyq salalaryna toqtalyp, shuǵyl sheshilýi tıis maqsat-mindetterdi aıqyndady. Ózim bilim salasynda jumys istegendikten osy salany jaqsartý men ǵylymǵa qoldaý kórsetý týraly berilgen mindettemeler qýantty. Prezıdent jetekshi ǵalymdarǵa turaqty jáne óz eńbegine laıyqty jalaqy tóleý máselesin kótere otyryp, ǵylymı zertteý ınstıtýttaryn tikeleı qarjylandyrý tártibin ázirleýdi tapsyrdy. Aldaǵy ýaqytta mınıstrlik ǵylymı mekemelerdi irikteýdiń ári qarjylandyrýdyń aıqyn ári ashyq erejesin ázirleıtin bolady», - dedi ol.

Onyń aıtýynsha, búgingi tańda búkil álem tsıfrlandyrý júıesin keńinen qolǵa alyp, damytý ústinde. Memleket basshysy salany jetildiretin mamandardy daıarlaý qajet ekendigin basa aıtty.

«Osyǵan oraı 100 myń IT maman daıyndaý qolǵa alynbaq. Meniń oıymsha, bul der kezinde aıtylǵan tapsyrma. Bul úshin JOO-da oqý baǵdarlamalaryn jańartyp, zamanǵa saı ázirleý qajet bolyp otyr. Geologııa, ekologııa, jasyl ekonomıka, aýyl sharýashylyǵy salalaryn damytýǵa mańyzdy mindettemeler júkteldi. Bizdiń ýnıversıtet bul salaǵa qajetti mamandardy daıarlaıtyn bilim ordalarynyń biri bolǵandyqtan, aldaǵy ýaqytta jańasha serpilispen oqytý protsessin uıymdastyratyn bolamyz», - dedi Jasulan Shaımardanov.