Prezıdenttiń BAÁ-ge sapary: Túrkistan men Jambyl oblystarynda jel elektr stantsııalary salynady

ASTANA. QazAqparat - Memleket basshysy Masdar kompanııasynyń bas atqarýshy dırektory Muhammed Ál-Ramahımen kezdesti, dep habarlady QazAqparat Aqordanyń resmı saıtyna silteme jasap.

Kezdesý barysynda energetıka salasyndaǵy birlesken jobany júzege asyrý máseleleri talqylandy.

Memleket basshysy Qazaqstan 2060 jylǵa deıin kómirsýtegi beıtaraptyǵyna qol jetkizýdi, sondaı-aq 2030 jylǵa deıin jańartylatyn energııa kózderiniń úlesin 4 paıyzdan 15 paıyzǵa deıin arttyrýdy kózdep otyrǵanyn aıtty.

Sonymen qatar Prezıdent Qazaqstan Respýblıkasy Energetıka mınıstrligi men KIDF qory jáne Masdar kompanııacy arasynda qol qoıylǵan yntymaqtastyq týraly memorandým tolyqqandy júzege asyrylatynyna senim bildirdi. Osy qujatqa sáıkes, Túrkistan jáne Jambyl oblystarynda qýattylyǵy 1 GVt jel elektr stantsııasyn salý jónindegi birlesken jobany iske asyrý josparlanyp otyr.

Óz kezeginde Muhammed Ál-Ramahı kezdeskeni úshin Qasym-Jomart Toqaevqa alǵys aıtyp, elimizdiń jasyl energetıkany damytý salasyndaǵy áleýeti zor ekenin atap ótti. Sondaı-aq onyń kompanııasy bul baǵyttaǵy iri jobalardy birlese júzege asyrýǵa múddeli ekenin jetkizdi.

Aıta keteıik, jeksenbi kúni Memleket basshysy resmı saparmen Birikken Arab Ámirlikterine bardy.

Keshe QR Prezıdenti «Abý Dabı turaqty damý aptalyǵy» sammıtiniń ashylý rásimine qatysyp, sóz sóıledi.

Al búgin Qasym-Jomart Toqaevty BAÁ Prezıdentiniń saraıynda saltanatty qarsy alý rásimi ótti.

Qasym-Jomart Toqaev BAÁ Prezıdenti sheıh Muhammed ben Zaıd Ál Nahaıanmen kelissóz júrgizdi.

QR Prezıdenttiń BAÁ-ge resmı sapary aıasynda 9 qujatqa qol qoıyldy.

Qasym-Jomart Toqaev pen BAÁ Prezıdenti Sheıh Muhammed ben Zaıd Ál Nahaıan birlesken málimdemesin jarııalady.

Qasym-Jomart Toqaev BAÁ Prezıdentine qonaqjaılylyǵy úshin alǵys bildirdi.

Foto: akorda.kz