Prezıdenttikke úmitker retinde tirkelgen kandıdatqa bıýdjetten qansha qarjy beriledi

NUR-SULTAN. QazAqparat - QR Prezıdenttigine úmitker retinde tirkelgen árbir kandıdatqa saılaý naýqanyn júrgizý úshin bıýdjetten 7,5 mln teńgeden beriledi. Bul týraly búgin QR Ortalyq saılaý komıssııasynyń múshesi Sábıla Mustafına aıtty, dep habarlaıdy QazAqparat tilshisi.

«Qazaqstan Respýblıkasyndaǵy saılaý týraly» Konstıtýtsııalyq zańnyń 12-babyna sáıkes, Ortalyq saılaý komıssııasyna saılaý naýqanyna qajet etiletin shyǵystardyń (Prezıdenttikke úmitker árbir kandıdatqa bólinetin shyǵys - red.) boljaldy smetasyn esepteý ókilettigi berilgen. Ol túzilgennen keıin Úkimetke usynylady. Qarjy bólý týraly sheshimdi Úkimet bekitedi. Saılaý kezekten tys bolǵannan keıin bul qarajat rezervten bólinedi. Bizdiń boljaldy smetamyz Qarjy mınıstrliginiń qaraýynan ótedi. Prezıdenttikke úmitker árbir kardıdatqa bıýdjetten shamamen 7,5 mln teńgeden bólý kerek dep eseptep otyrmyz», - dedi ol.

Onyń atap ótýinshe, memleket kandıdattarǵa respýblıkalyq bıýdjetten teńdeı qarjy bólinýine kepildik beredi.

«Bul - BAQ-ta saılaýaldy sóz sóıleýine arnalǵan: radıoda - 10 mınýt, telearnada - 15 mınýt, eki materıal jarııalaý, kandıdattyń jarııa is-sharalary men úgit materıaldaryn shyǵarý, sonymen qatar saılaýshylarmen kezdesýin uıymdastyrýǵa jumsalatyn qarajat. ıAǵnı, buǵan úı-jaı jaldaý men kólikke ketetin shyǵyndar da kiredi», - dedi S.Mustafına.

Buǵan deıin QR Ortalyq saılaý komıssııasy tóraǵasynyń orynbasary Konstantın Petrov aǵymdaǵy jyldyń 9 maýsymynda ótetin kezekten tys prezıdent saılaýyna kandıdattardy usyný 28 sáýirde aıaqtalatynyn málim etken bolatyn.