Prezıdenttikke úmitker Q.Tóregeldıev «Otty jyldar taǵylymy» taqyryby arqyly memlekettik tildi erkin meńgergendigin dáleldemek

ASTANA. QazAqparat - Búgin QR Prezıdenttigine kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııa aldynda prezıdenttikke ózin-ózi usynǵan Qanat Tóregeldıev synaq tapsyrýǵa kiristi.

«Búgin qazaq tilin erkin meńgergendigin dáleldeý úshin prezdenttikke úmitker Tóregeldıev Qanat Sybashuly myrza kelip otyr. 1962 jyly týylǵan, bilimi joǵary. Bul kisi ózin-ózi usynyp otyr. Ýaqytsha jumys istemeıdi», - dedi úmitkerdi tanystyrǵan komıssııa múshesi Myrzataı Joldasbekov.

Onyń atap ótýinshe, Q.Tóregeldıev 2011 jyly ótken prezıdenttik saılaýda da úmitker retinde tirkelip, memlekettik tildi erkin meńgergendigin anyqtaý synaǵyna qatysqan.

«Ózińiz de jaqsy bilesiz, burynǵy retpen úsh suraq beriledi. Birinshisi, jazba jumysy. Arnaıy daıyndalǵan taqyryptan birin tańdap alasyz. Sizge 1 saǵat ýaqyt beriledi. Eger úlgermeı jatsańyz, onda komıssııa taǵy 30 mınýt qosa alady. Ekinshi kezeńde kórkem shyǵarmadan mátin oqısyz. Odan ótkennen keıingi úshinshi synaq - erkin taqyryp. Ol da aldyn ala belgilengen. Sonyń ishinen birin tańdap, 1 saǵat daıyndalyp, sol taqyryp tóńireginde sóıleısiz», - dedi komıssııa tóraǵasy.

Osydan keıin prezıdenttikke úmitker Q.Tóregeldıevke «Otty jyldar taǵylymy» taqyryby tústi. «Otty jyldar taǵylymy» deıdi. Bul qaı otty jyldar? Soǵys jyldary ma?», - dep surady úmitker komıssııa múshelerinen.

«Biz otty jyldar degende negizinen Uly Otan soǵysyn aıtamyz ǵoı. Tarıh qoınaýyna ary qaraı enseńiz uzaq-sonar áńgime bolyp ketedi», - dep jaýap berdi M.Joldasbekov.

Aıta keteıik, Qanat Tóregeldıev 2011 jyly da prezıdenttik saılaýǵa úmitker bolyp, alaıda óz jaqtaýshylarynyń qolyn jınap úlgermegendikten kandıdatýrasyn qaıtyp alǵan bolatyn.