Prezıdenttikke úmitker Amangeldi Taspıhov barlyq talapqa saı - OSK
Qaýly jobasyn QR Ortalyq saılaý komıssııasynyń hatshysy Sabıla Mustafına tanystyrdy. Ol 2019 jyldyń 25 sáýirinde «Qazaqstan Respýblıkasyndaǵy saılaý týraly» QR Konstıtýtsııalyq zańynyń 55-babyna sáıkes, «Qazaqstan Respýblıkasynyń Kásipodaqtar federatsııasy» Respýblıkalyq kásipodaqtar birlestiginiń Amangeldi Satybaldyuly Taspıhovty prezıdenttikke kandıdat retinde usynýyna baılanysty onyń tıisti qujattaryn QR Ortalyq saılaý komıssııasyna ótkizgenin eske saldy.
Ortalyq saılaý komıssııasy kandıdat Amangeldi Taspıhovtyń Konstıtýtsııada jáne «Qazaqstan Respýblıkasyndaǵy saılaý týraly» Konstıtýtsııalyq zańda belgilengen talaptarǵa sáıkestigin tekserýge járdemdesýi úshin ýákiletti memlekettik organdarǵa suraý saldy jáne tıisti málimetter aldy. 2019 jyldyń 26 sáýirinde QR Ortalyq saılaý komıssııasynda kandıdattyń memlekettik tildi erkin meńgergenin anyqtaý jóninde lıngvıstıkalyq komıssııanyń otyrysy ótti jáne komıssııa úmitkerdiń memlekettik tildi erkin meńgergeni jóninde sheshim qabyldady.
Sonymen birge, Ortalyq saılaý komıssııasy Іshki ister mınıstrliginiń Kóshi-qon qyzmeti komıtetiniń málimetteri negizinde Amangeldi Tasphovtyń Qazaqstanda týǵanyn, QR azamaty ekenin, sońǵy 15 jylda Qazaqstanda turǵanyn anyqtady. Onyń joǵary bilimi bar, sottalmaǵan, sybaılas jemqorlyq boıynsha jaýapqa tartylmaǵan, belsendi saılaý quqyǵyna ıe jáne memlekettik qyzmette jáne saılanbaly laýazymdarda keminde 5 jyl jumys tájirıbesi bar.
QR OSK qabyldaǵan qaýlynyń 1-tarmaǵynda úmitker Amangeldi Satybaldyuly Taspıhovtyń QR Konstıtýtsııasyna jáne «Qazaqstan Respýblıkasyndaǵy saılaý týraly» QR Zańynda qoıylǵan talaptarǵa saı keletini aıtylǵan.
Ekinshi tarmaqta oblystardyń, respýblıkalyq mańyzy bar qalalardyń, Qazaqstan Respýblıkasy astanasynyń saılaý komıssııalaryna Qazaqstan Respýblıkasynyń Prezıdenttigine kandıdatty qoldap qol jınaýǵa arnalǵan qol qoıý paraqtaryn Amangeldi Taspıhovqa berý tapsyrylǵan.