Prezıdenttikke kandıdatty qoldap qol jınaý paraǵynyń úlgisi bekitildi
Qaýly jobasyn tanystyrǵan QR Ortalyq saılaý komıssııasynyń múshesi Aqylbek Ihdanov aıtýynsha, «Saılaý týraly» Konstıtýtsııalyq zańnyń 56-baby 1-tarmaǵyna sáıkes saılaýshylardyń Prezıdenttikke kandıdatty qoldaýy olardyń qol jınaýy arqyly rastalady. Osy zańnyń 56-baby 3-tarmaǵyna sáıkes Prezıdenttike kandıdatty qoldap qol jınaýdy senim bildirilgen adamdar uıymdastyrady jáne kandıdattyń Konstıtýtsııada jáne «Saılaý týraly» Konstıtýtsııalyq zańda belgilengen talaptarǵa sáıkestigin teksergennen keıin 5 kún merzimnen keshiktirmeı Ortalyq saılaý komıssııasy beretin qol qoıý paraqtarymen rásimdeledi.
«2019 jyldyń 1 qańtarynda respýblıka saılaýshylarynyń jalpy sany 11 mln 814 myń 19 adamdy quraıdy. Jalpy sannyń 1 paıyzy 118 myń 140 adamdy quraıdy. Osylaısha, Prezıdenttikke kandıdat118 myń 140 saılaýshynyń qoldaýyna ıe bolýy tıis», - dedi ol.
Komıssııa múshesiniń aıtýynsha, árbir qol qoıý paraǵynyń rettik nómiri bolýǵa jáne oǵan kandıdattyń tegi, aty jáne ákesiniń aty, onyń senim bildirilgen adamynyń jeke qoly, qol jınaýshy adamnyń tegi, aty jáne ákesiniń aty, qol jınaý júrgiziletin eldi mekenniń ataýy, sondaı-aq qol qoıatyn adamdar týraly ómirbaıandyq málimetterdi qamtıtyn baǵandar engizilýge tıis. Kandıdattardyń ózderine saılaý naýqanyn ótkizýge kómektesetin, saılaý aldyndaǵy úgit júrgizetin, kandıdattardyń múddelerin bildiretin senim bildirilgen adamdary bolýǵa quqyǵy bar. Kandıdattar senim bildirilgen adamdardy óz qalaýy boıynsha tıisti saılaý okrýgindegi árbir saılaý ýchaskesine úsh adamnan aspaıtyn sanda anyqtaıdy. Óz kezeginde, olar tıisti saılaý komıssııasyna senim bildirilgen adamdar bolýǵa óz kelisimi týraly ótinish beredi.
«Saılaý komıssııasy senim bildirilgen adamdardy tirkegennen keıin olarǵa tıisti kýálik beredi. Senim bildirilgen adam Qazaqstan Respýblıkasynyń azamaty bolýǵa tıis, qandaı da bir saılaý komıssııasynyń múshesi, saıası memlekettik qyzmetshi laýazymyn atqaratyn tulǵa bola almaıdy. Saılaý týraly qoldanystaǵy zańnamaǵa sáıkes senim bildirilgen adamdar qol jınaýdy uıymdastyrý maqsatynda tikeleı saılaýshylar qolyn jınaıtyn basqa da adamdardy tarta alady», - dedi A.Ihdanov.
Qol jınaýshy adam qoldardy jınaǵan kezde tıisti qol qoıý paraǵynda jeke qoly turǵan kandıdattyń senim bildirilgen adamyn tirkeý týraly kýáliktiń kóshirmesin kórsetýge tıis. Qol jınaıtyn adam qol qoıý paraǵyna mindetti túrde óziniń jeke qolyn qoıady. Qol jınaýshy adamdarǵa qosymsha zańnamalyq talaptar belgilenbegen. Prezıdenttikke kandıdatty qoldap qol jınaý jónindegi toltyrylǵan qol qoıý paraqtary aýmaqtyq saılaý komıssııasyna tapsyrylady, ol 10 kúndik merzimde pasport qyzmetteriniń jumyskerlerin tarta otyryp, qoıylǵan qoldardyń durystyǵyn tekserýdi júzege asyrady, Prezıdenttikke kandıdatty qoldaıtyn qoldardyń durystyǵyn tekserý nátıjeleri týraly tıisti hattamany resimdeıdi jáne ony Ortalyq saılaý komıssııasyna jiberedi.
«Prezıdenttikke kandıdatty qoldap qol jınaýdy jáne olardyń durystyǵyn tekserýdi uıymdastyrý týraly» qaýlymen Ortalyq saılaý komıssııasynyń qol qoıý paraqtaryn berý merzimderi 5 kúnnen 2 kúnge deıin qysqartyldy, al qoıylǵan qoldardyń durystyǵyn tekserý merzimi eki esege 10 kúnnen 5 kúnge deıin qysqardy. Osylaısha, saılaýdy uıymdastyrýshylar ishki rásimderdi ótkizý merzimderin qysqartý esebinen saılaý protsesine qatysýshylardyń is-sharalaryna arnalǵan ýaqytty ulǵaıtady.