Prezıdenttikke kandıdattardyń daıyndalýyna 2 aı jetkilikti me – Mýsın jaýaby

NUR-SULTAN. QazAqparat – Otanynyń qamyn oılaǵan saıasatker ár ýaqyt saılaýǵa daıyn bolýy tıis. Bul týraly QR Ádilet mınıstri Qanat Mýsın aıtty, dep habarlaıdy QazAqparat tilshisi.

Parlament palatalarynyń birlesken otyrysynan keıin BAQ ókilderi mınıstrden: «Kezekten tys Prezıdent saılaýyna túsetin kandıdattar úshin eki aı merzim daıyndalýǵa jetkilikti bola ma?», - dep suraǵan edi.

«Eki aı merzim jetkilikti. Eger saıasatker óz Otanynyń, halqynyń qamyn oılasa, onda ol ár ýaqytta saılaýǵa daıyn bolýy kerek», - dedi Qanat Mýsın.

Sonymen qatar BAQ ókilderi odan «Qazaqstan Respýblıkasyndaǵy saılaý týraly» Konstıtýtsııalyq zańnyń 54-babynan prezıdenttikke kandıdattarǵa qoıylatyn memlekettik qyzmette nemese saılanbaly memlekettik laýazymdarda keminde 5 jyldy quraıtyn jumys tájirıbesi bolý normasyn alyp tastaý úshin ne isteý kerektigin surady.

«Bul Zańǵa ózgeris engizý úshin Parlamenttiń sheshimi kerek», - dedi mınıstr.

Eske salaıyq, buǵan deıin Q.Mýsın saılaýdyń naqty qaı kúni ótetinin Prezıdent óz Jarlyǵymen jarııalaıtynyn aıtqan edi. «Saılaý datasy belgilengennen keıin eki aıdyń ishinde saılaý ótkiziletin bolady», - dedi ol.

Sondaı-aq ol « Kelesi Prezıdent Konstıtýtsııaǵa ózgertý engize ala ma?» degen BAQ ókilderiniń suraǵyna jaýap berdi.

Búgin depýtattar «Qazaqstan Respýblıkasynyń Konstıtýtsııasyna ózgerister men tolyqtyrý engizý týraly» QR Zańyn qabyldady.

Oǵan sáıkes, Prezıdenttiń mandaty qaıta saılaný múmkindiginsiz bir merzimge shektelip, jeti jyl merzimge uzartylady; Nur-Sultan qalasynyń ataýy qaıtadan Astana bolyp ózgeredi; Konstıtýtsııalyq Sot sýdıalarynyń ókilettik merzimi 8 jylǵa deıin ulǵaıtylady.

Vıdeodan alynǵan kadr