Prezıdenttikke kandıdat Saltanat Tursynbekova: 200-deı azamattyń qolyn ózim jınadym
16:00, 20 Qazan 2022
ASTANA. QazAqparat – Prezıdenttikten úmitker Saltanat Tursynbekovanyń kandıdatýrasyn Ortalyq saılaý komıssııasynda tirketýge qajetti daýys jınaý úshin ózi de el arasyna shyqqanyn aıtty, dep habarlaıdy QazAqparat tilshisi.
Áýeli ol ózin prezıdent saılaýyna kandıdat retinde usynǵan «Qazaq analary – dástúrge jol» respýblıkalyq qoǵamdyq birlestigine alǵys bildirip, senimderin aqtaıtynyn jetkizdi.
«Men prezıdent saılaýyna úmitker retinde sońǵy kúni qujat ótkizgenimizdi bilesizder. Oǵan deıin óńirlerdiń bárin aralap, meniń kandıdatýramdy usynǵan analardyń bárimen kezdesip, shalǵaıdaǵy aýylǵa deıin baryp, «Men shynynda da da laıyqpyn ba» degen suraqqa jaýap izdedim. Sodan keıin baryp men qujat tapsyrý týraly sheshim qabyldadym», - dedi ol OSK kýlýarynda.
Úmitker ózin kandıdat retinde tirkeýge qajet daýysty negizinen «Qazaq analary – dástúrge jol» respýblıkalyq qoǵamdyq birlestiginiń jergilikti fılıaldary jınaǵanyn atap ótti.
«Bul ujymnyń bizdiń 20 óńirde fılıaldary bar. Aýyldaǵy analar, atalar, ákeler uıymdary, jas azamattar bári meni tanyǵannan keıin qol jınaýǵa úlken úles qosty. Árıne, meniń ózimniń de paraqty alyp, daýys jınaýǵa shyqqan kezderim boldy. Shtabtaǵy úılestirý jumysyna kóńil kóbirek bólgennen keıin bir 200-deı qol jınadym», - dedi Saltanat Tursynbekova.