Prezıdenttikke kandıdat Nurlan Áýesbaev Aqtóbe jurtymen kezdesti

AQTÓBE. QazAqparat – QR Prezıdenttigine Jalpyulttyq sotsıal-demokratııalyq partııasy atynan úmitker Nurlan Áýesbaev Aqtóbe oblysynda turǵyndarmen kezdesti, dep habarlaıdy QazAqparat tilshisi.

Jalpyulttyq sotsıal-demokratııalyq partııasy baspasóz qyzmetiniń habarlaýynsha, Nurlan Áýesbaev saılaýaldy úgit-nasıhat jumysyn Alǵa aýdany Bestamaq aýylynan bastady. Aýyldyq mádenıet úıinde jergilikti turǵyndarmen kezdesý ótkizdi. Turǵyndar úmitkerge Aqtóbe-Atyraý tas jolyna baılanysty saýaldaryn qoıdy. Búginde eki jolaqty jol tórt jolaqqa keńeıtilip jatyr ári jol eldimekendi ekige bólgen. Sonymen qatar, jolda kólik qozǵalysy joǵary, jeńil jáne júk kólikteri júredi. Jergilikti turǵyndar úshin óz qıyndyǵy bar. Birinshiden, jol boıynda ornalasqan úıde kúndiz-túni kólik dybysy estiledi. Ekinshiden, turǵyndar únemi joldy kesip ótýge májbúr, al bul – óte qaýipti. Demek, aınalma jol salý ózekti másele.

Kezdesýden keıin Nurlan Áýesbaev aty ańyzǵa aınalǵan batyr, qolbasshy Eset batyrdyń kesenesine bardy. Qazaq halqyna amandyq men baq-bereke tilep, quran baǵyshtady.

Eske salsaq, QR Prezıdenti saılaýyna kandıdat Nurlan Áýesbaevqa qoldaý kórsetetin shtab ashyldy. Shtabta baspasóz qyzmeti, joba úılestirýshileri, SMM jáne basqa da mamandar jumys isteıdi.