Prezıdenttik jastar kadrlyq rezervine irikteý júrgiziledi
11:14, 20 Qańtar 2023
ASTANA. QazAqparat – Bıyl prezıdenttik jastar kadrlyq rezervine kezekti irikteý júrgiziledi. Bul týraly Memlekettik qyzmet isteri agenttiginiń tóraǵasy Darhan Jazyqbaev aıtty, dep habarlaıdy QazAqparat tilshisi.
«Bıyl prezıdenttik jastar kadrlyq rezervine kezekti irikteý júrgizemiz. Rezervshilerdi jumysqa ornalastyrý barysynda túrli qıyndyqtarmen betpe-bet keletindigimizdi moıyndaý qajet. Keıbir memlekettik organdarǵa 10 rezervshi taǵaıyndalsa, endi bir organda birde-bir rezervshi taǵaıyndalmaǵan. Áleýmettik mańyzy bar densaýlyq saqtaý, energetıka, bilim berý syndy salalardaǵy rezervshilerdiń sany tym az», - dedi Darhan Jazyqbaev elordada ótken brıfıng barysynda.
Onyń atap ótýinshe, osyǵan baılanysty kadr rezervin irikteý barysynda salalyq toptar naqty jikteledi. Kandıdattarmen áńgimelesý salalyq memlekettik organdardyń ókilderiniń jáne mamandardyń qatysýy mindetti bolady.