Prezıdenttik jastar kadrlyq rezervi: Sápıev orta jolda ne úshin súringenin aıtty

NUR-SULTAN. QazAqparat – Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Serik Sápıev Prezıdenttik jastar kadrlyq rezerviniń ekinshi kezeńinen ne úshin ótpeı qalǵanyn aıtty, dep habarlaıdy QazAqparat tilshisi.

«Birinshi kezeńnen ótkenimmen, ekinshisinen óte almaı qaldym. Mundaı emtıhandardy tapsyryp kórmep edim. Internet arqyly tapsyrǵanda 30 baldy áreń jınadym. Ekinshi týrda 30 suraq boldy. Ol jerde matematıkalyq suraqtar kezdesti. Kúrdeli eken. Ýaqyt jetpeı qaldy. Aqyry, bilmegen suraqtarǵa joramaldap jaýap bere berdim», - dedi Serik Sápıev búgin Ortalyq kommýnıkatsııalar qyzmetinde ótken baspasóz máslıhatynan keıin tilshilerdiń saýalyna oraı.

Komıtet tóraǵasy Prezıdenttik jastar kadrlyq rezervine ótýge jospary bolmaǵanyn aıtyp ótti.

«Ózimdi teksergim keldi. Osynaý Prezıdenttik jastar kadrlyq rezerviniń arqasynda keıin memlekettik qyzmetke, kvazısektorǵa úmitkerler iriktelip alynatynyn túsindim. Qazir eńbektenip, jumys istep júrmin. Sol sebepti, odan ótpeı qalǵanyma asa qynjylmaımyn», - dedi ol.

Eske sala ketsek, osydan eki apta buryn Prezıdent Qasym-Jomart Toqaev Prezıdenttik jastar kadrlyq rezervin jasaqtaý barysymen tanysqan bolatyn. Memlekettik qyzmet isteri agenttiginiń tóraǵasy Anar Jaıylǵanova Memleket basshysyna Prezıdenttik jastar kadrlyq rezervin jasaqtaýǵa baılanysty konkýrstyń ótkizilýi jóninde baıandaǵan edi.