Prezıdenttik jastar kadr rezervine irikteý qalaı ótýde – qatysýshylardyń pikiri
«Elimizdegi joǵary basqarýshylyq memlekettik laýazymdarǵa, ulttyq holdıngter men kompanııalardaǵy joǵary basqarýshy laýazymdarǵa taǵaıyndalýǵa múmkindik. Osyndaı perspektıva elimizdegi jáne sheteldegi myńdaǵan jas qazaqstandyqtardyń qyzyǵýshylyǵyn týdyrdy. Olardyń barlyǵy «Prezıdenttik jastar kadr rezervine» irikteýge qatysty», delingen habarlamada.
Prezıdenttik rezervke úmitkerlerdiń ishindegi 300 barynsha talantty jáne daıarlanǵan jastar alynady.
Qazirgi ýaqytta testileýdi verıfıkatsııalaý qorytyndysy boıynsha 549 qatysýshy jobany tanystyrý, esse jazý jáne quzyretterin baǵalaý sııaqty úsh kezeńnen turatyn irikteýdiń kelesi kezeńi - «Áleýetti baǵalaýdan» ótýde. Osy kezeńde úmitkerlerdiń essesi men jobalyq jumysy onlaın túrde bir ýaqytta úsh sarapshymen baǵalandy.
Úmitkerlerdiń quzyretterin baǵalaý úshin sertıfıkattalǵan baǵalaýshylar men kásibı sýpervızorlar tartyldy. Olar úmitkerlerdiń quzyretterin minez-qulyq ındıktorlary arqyly, jeke jáne toptyq assesment quraldaryn qoldana otyryp anyqtaıdy.
«Áleýetti baǵalaý» kezeńine ótken úmitkerler ózderiniń irikteý jónindegi oılarymen bólisti.
Bekjan, kásipker:
«Basynda 13 myń adamnyń tirkelgenin (Pkrezetv.kz saıtynda – esk.) kórgen kezde tań qaldym, óıtkeni, bir jarym, eki myń adam bolady dep oıladym...
Kóptegen jastardyń bul jobaǵa qyzyǵýshylyǵy zor ekeni baıqalady. Sonyń ishinen bes júz adamnyń ishine kirip otyrǵanymyz, biz úshin bir mártebe dep oılaımyn...
Óte myqty uıymdastyrylǵan, eshqandaı kedergiler bolǵan joq. Basynda «suraqtary qıyn» degen sóz boldy, biraq meniń oıymsha saıdyń tasyndaı saptalǵan jigitter, qyzdar sondaı suraqqa jaýap bere bilý kerek.
Shyndyqty aıtqanda, tań qalyp otyrmyz, jeńil bolady degen oımen kelgenbiz. Biraq, búgingi tapsyrmalardy kórip sheteldik kompanııalarǵa jumysqa turyp jatqandaı sezimge bólenip otyrmyn».
IT-salasynyń mamany Azamat irikteýden ótpeı qalǵan jaǵdaıda eshqashan ókinbeıtinin aıtady.
«Men osyndaı jobaǵa qatystym. 550 adamnyń ishine kirgenime óte qýandym (testileýdi verıfıkatsııalaý qorytyndysy boıynsha 549 qatysýshy kelesi «Áleýetti baǵalaý» kezeńine ótti – esk.)», - deıdi ol.
Alekseı, jylý-energetıka salasynyń mamany:
«Bul óte ashyq júıe. Men neniń qashan iske qosylatynyn, ózimnen neniń talap etiletinin túsinip otyrdym. Ol bir kún ishinde ǵana daıyndalmaı, oılastyrylyp jasalǵany baıqalady. Barlyǵy óz kezegimen júretin naqty ashyq júıe. Sen óz ornyńdy kórip, aldaǵy ýaqytta ne kútip turǵanyn qaraı alasyń. Meniń oıymsha bul aqyldy jastar úshin erekshelenip, ózin joǵary dárejede kórsetý úshin keremet múmkindik…».
Aınara esimdi memlekettik qyzmetshi 24 saǵat boıy qashyqtyqtan testileýdiń yńǵaıly bolǵanyn aıtady. Onyń aıtýynsha, uıymdastyrýshylar BAQ pen áleýmettik jeliler arqyly irikteý boıynsha tolyq aqparat berdi.
Danıel, týrızm salasy:
«Uıymdastyrý maǵan óte qatty unady. Árbir kezeń saıyn men ózime jańa synaq, challenge alyp otyrdym: prezentatsııa jasaý, 5 mınýt ishinde 5 slaıd kórsetý, belgili ýaqyt ishinde esse tapsyrý. Búgingi assesment, ár rette jyldamdatyp otyrady. Uıymdastyrý jaǵynan barlyq aqparattyń qoljetimdi bolǵanyn atap ótkim keledi…»
Elına, memlekettik qyzmetshi:
«Kadr rezervi jóninde habarlandyrý shyqqannan keıin birden qatysqym kelip ketti. Biraq aınalamdaǵy adamdar kúmánmen qarap, «qyzǵylt kózildirigińdi shesh, ony qaıtesiń jáne onda barlyǵy sheshilip qoıǵan shyǵar» dedi. Men talaptanyp kórý kerek dep aıttym. Birinshiden, Prezıdent ózi jarııalady. Ekinshiden, bul baq synap kórýge turarlyq jańa format. Úshinshiden, bul - úlken múmkindik. Jalpy jobanyń ózi biregeı. Meniń oıymsha munymen barlyq qatysýshylar kelisedi. Onlaın jáne oflaın kezeńder de bar. Bul árbir úmitkerge arnalǵan keshendi tásil. Ol óte myqty ári jattyqqan uıymdastyrýshylar toby. Barlyǵy óte sapaly jasalǵan. Tehnıkalyq qoldaýǵa ótinim bergen kezde shuǵyl arada jaýap beredi. Máseleńdi sheship qana qoımaı, qoldaý kórsetýge tyrysady...»
Gúlzıra, kásipodaq uıymynyń qyzmetkeri:
«Birinshi kezekte meni saıttyń tehnıkalyq qamtylýy tań qaldyrdy... Barlyq qajetti jaǵdaılar men zattar aldyn-ala qarastyrylǵan. Óz aldymda qandaı da bir naqty tehnıkalyq qıynshylyqtar týyndaǵan joq. Assesment – ol úmitkerdiń quzyretterin jan-jaqty anyqtaýǵa múmkindik beretin quzyretterdi baǵalaýdyń zamanaýı úrdisi... Búgingi assesment taım-menedjment tarapynan óte jaqsy uıymdastyrylǵan. Biz ózimizdiń kestemizdi, logıstıkamyzdy, ıaǵnı qaıdan qaıda barý kerektigin bilemiz. Qandaı strımge jatatynymyzdy bilemiz. Bul túster, aýdıtorııalar, adamdar sany boıynsha retteý... Men bizdiń memlekettik organnyń qysqa merzimde osyndaı aýqymdy jobany júzege asyra alatynyn maqtan tutamyn.
Búgingi tańda men úlken nátıjelerge qol jetkizdim, men osy 549 adamnyń ishine kirdim. Men sońyna deıin barýǵa jáne ózimniń barlyq áleýetimdi kórsetýge daıynmyn».
Eske sala ketsek, Memleket tasshysy Qasym-Jomart Toqaev óziniń «Igilik barshaǵa! Sabaqtastyq. Ádildik. Órleý» saılaýaldy baǵdarlamasynda elde Prezıdenttik kadrlyq rezervti qalyptastyrý qajettigin jarııalady. Oǵan úmitkerlerdi irikteý 1 qyrkúıekte bastaldy.