Prezıdenttik jastar kadr rezervin mansapqa jetý joly dep qaramaý kerek – sarapshy
«Jastar jylynda qolǵa alynǵan iri ári mańyzdy bastamalardyń biri – Prezıdenttik jastar kadr rezervin jasaqtaý. Bul, eń áýeli, adamı kapıtaldyń mańyzdylyǵyn kórsetken joba boldy dep esepteımin. Adamnyń qyzmettegi jetistigi, eńbek ónimdiligi men turmys sapasy tikeleı onyń bilimi men biliktiligine táýeldi ekenin eskersek, árbir kásibı maman óz kezeginde memleket damýynyń negizgi qozǵaýshy kúshine aınala alady. Kadr rezerviniń maqsaty da dál osyndaı bilimdi, bilikti, oıly, talantty, tájirıbeli jastardy irikteý boldy. Bul baıqaýǵa qatysýǵa nıet bildirgen jastar bes deńgeıden turatyn, úmitkerlerdiń qabilet-darynyn jan-jaqty aıqyndaýǵa negizdelgen test, esse, joba qorǵaý, quzyrettilik boıynsha synama, áńgimelesý sııaqty kezeńderden ótip, 300 adam iriktelip shyqty», - dedi sarapshy QazAqparat tilshisine bergen suhbatynda.
Onyń aıtýynsha, joba qorytyndysy belgili bir tujyrym jasaýǵa múmkindik beredi. Memleket osy arqyly merıtokratııa qaǵıdasyna arqa súıeıtinin jáne ony barynsha kúsheıtetinin kórsetti.
«Qazir elimizde jastardyń sany 4 mıllıonǵa jýyqtady. Bul – Qazaqstan halqynyń eleýli bóligi. Sondyqtan olardyń tyń oılaryn, jalyndy jigerin turǵyndary da jas, ózi de jas Qazaqstannyń damýyna paıdalaný mańyzdy. Osy arqyly memleket el jastary úshin áleýmettik lıftti qamtamasyz etýde. Ádiletti áleýmettik lıft qalyptastyrý – ádiletti qoǵam qurýdyń da biregeı joly. Osy oraıda aıta keterlik jaıt, jastar bul jobaǵa tek mansapqa jetý múmkindigi dep emes, kerisinshe, elge paıdaly oılardy iske asyrýdyń múmkindigi dep qaraǵany jón. Bul týraly Prezıdentimiz de aıtqan bolatyn», - dedi J. Maılybaı.
Spıker Prezıdenttiń jastar kadrlyq rezervin memlekettik qyzmet salasy boıynsha qolǵa alynǵan irgeli saıasattyń mańyzdy bóligi dep atady.
«Elbasy «100 naqty qadam» Ult josparynda tıimdi ári kásibı memlekettik apparat qalyptastyrý kerek ekenin aıtqan bolatyn. Al, Prezıdent Q.K. Toqaev memlekettik qyzmettiń tıimdiligin arttyrý úshin daıyndyǵy tolysqan jas kadrlardy tartý kerek degen edi. Kadrlyq rezerv osy maqsatty kózdeıtinin jáne bul bastama búgin mańyzdy bir mejeni baǵyndyrǵanyn kórip otyrmyz. Munyń barlyǵy jalpy alǵanda memleketimizdiń strategııalyq kadrlyq josparlaý saıasaty júıelenip kele jatqanyn kórsetedi», - dedi Jasulanbek Maılybaı.
Aıta keteıik, búgin Ortalyq kommýnıkatsııalar qyzmetindegi baspasóz máslıhatynda QR Prezıdenti Ákimshiligi Basshysynyń orynbasary Máýlen Áshimbaev Prezıdenttik jastar kadr rezervine engen 300 qazaqstandyqtyń anyqtalǵanyn málimdedi. Jeńimpazdardyń ortasha jasy 31-de.
Joba jeńimpazdarynyń tolyq tizimin Prezıdenttik jastar kadr rezerviniń resmı saıtynan kórýge bolady.