Prezıdenttik saılaý: Kandıdat Amangeldi Taspıhov memlekettik til synaǵynan ótti
25 sáýirde Amangeldi Taspıhov «Qazaqstan Respýblıkasynyń kásipodaqtar federatsııasy» Respýblıkalyq kásipodaqtar birlestigi atynan prezıdent saılaýyna kandıdat retinde qujat tapsyrǵan bolatyn.
«Synaq ádettegideı úsh kezeńnen ótti. Jazbasha jumysqa Amangeldi Satybaldyuly Taspıhov «Meniń elim» taqyrybyn tańdady. Bul taqyryptardyń barlyǵy konvertke salynǵan, aldyn ala bekitilgen. Úmitkerdiń jazbasha jumysy óte saýatty jazylǵan. Árıne, azdaǵan pýnktýatsııalyq qateler ketti. Biraq, shyǵarma mazmuny tereń, taqyryp jaqsy ashylǵan», - dedi Ádil Ahmetov QR Ortalyq saılaý komıssııasynda ótken brıfıngte.
Ekinshi tapsyrma boıynsha kandıdat belgili aqyn Qadyr Myrza Álıdiń tańdamaly shyǵarmalar jınaǵynan óleń oqydy.
«Úshinshi tapsyrmada sóz sóıleý úshin úmitkerge «Til taǵdyry - el taǵdyry» taqyryby tústi. Ol óz ýaqytyn tolyqqandy paıdalandy. Komıssııa onyń jumystaryna jan-jaqty taldaý júrgizip, qorytyndylady. Komıssııa biraýyzdan Amangeldi Taspıhovty tehnıkalyq ınstıtýt bitirgen ınjener bolsa da, tili óte jatyq, barlyq tapsyrmalar boıynsha memlekettik tildi erkin meńgergen degen sheshim shyǵardy», - dedi komıssııa múshesi.
Eske sala ketsek, Qazaqstanda kezekten tys prezıdent saılaýy 2019 jyldyń 9 maýsymynda ótedi.
Osy ýaqytqa deıin usynylǵan kandıdatýralar: «Nur Otan» partııasy atynan Qasym-Jomart Toqaev, «Aq jol» demokratııalyq partııasynan - Dánııa Espaeva, «Uly dala qyrandary» respýblıkalyq qoǵamdyq birlestigi atynan - Sádibek Túgel, «Qazaqstan Respýblıkasynyń kásipodaqtar federatsııasy» Respýblıkalyq kásipodaqtar birlestiginen - Amangeldi Taspıhov, Qazaqstannyń Kommýnıstik Halyq partııasynan - Jambyl Ahmetbekov jáne «Aýyl» halyqtyq-demokratııalyq partııasy atynan - Tóleýtaı Rahymbekov.
Aıta keteıik, QR Prezıdenttigine úmitkerlerdi usyný 28 sáýir kúni, QR OSK-da tirkeý protsedýralary 11 mamyrda aıaqtalady.