Prezıdenttik qoldaý: Túrkistandyq tabysy az otbasylarǵa tegin azyq-túlik sebetteri berile bastady

TÚRKІSTAN. QazAqparat – Túrkistan oblysynda tabysy az otbasylarǵa kepildik berilgen áleýmettik toptamalar berile bastady. Azyq-túlik sebetteri tótenshe jaǵdaı kezinde kópbalaly jáne muqtaj januıalarǵa aıtarlyqtaı qoldaý bolyp otyr, dep habarlaıdy QazAqparat tilshisi.

Memleket tarapynan áleýmettik toptama alǵan analardyń biri - Móldir Ótegenova. Túrkistan qalasynda turatyn kópbalaly ananyń alty perzenti bar. Beseýi mektep jasynda bolsa, kenjesi tórtte. Otaǵasy Ardaq Serdalıev bir mekemeniń kúzetshisi bolyp eńbek etken. Alaıda jumys orny jabylyp qalǵan. Januıanyń turmystyq jaǵdaıyn eskergen oblys ákimdigi qıyn-qystaý kezeńde tegin azyq-túlikter jetkizip bergen. Mundaı qamqorlyqqa otanasy dán rızashylyǵyn bildirdi.

«Bizge ákelgen azyq-túlikterdiń ishinde makaron, táttiler,sút pen maı sııaqty eń qajetti taǵamdar bar. Balalar kóp bolǵan soń, tamaq ta kóbirek kerek. Óıtkeni qazir barlyǵy úıde bolǵandyqtan úsh mezgil tamaq jasaýym kerek. Osyndaı qıyndyqtar kezinde bizge azyq-túlik jetkizip bergen bılik basyndaǵy azamattarǵa alǵysymyzdy bildiremiz. Men sııaqty kópbalaly analarǵa bul úlken kómek»,- deıdi Móldir Ótegenova.

Dál osyndaı azyq-túlik sebetin túrkistandyq ana Faragat Arıpova da alǵan. 32 jastaǵy kelinshektiń úsh perzenti bar. Tuńǵyshy 11 jasta bolsa, kenjesi 4-ke endi tolǵan. Otanasy taǵy tórtinshisine aıaǵy aýyr. Kúıeýi ýaqytsha kólikpen jolaýshy tasymaldap tabys taýyp júrgen. Alaıda tótenshe jaǵdaı kezinde oǵan kóshege shyǵýǵa shekteý qoıylyp otyr. Sondyqtan januıanyń turmys jaǵdaıy qıyndady.

«Meniń densaýlyǵym jumys isteýge jaramaıdy. Baýyrym aýyrady, esepke alynǵanmyn. Kúıeýimniń de turaqty jumysy joq. Balalardyń bir ǵana járdemaqysyna ómir súrý qıyn bolyp ketti. Al, memleket tarapynan azyq-túlikterdiń berilýi bizge kóp kómek bolyp otyr»,- deıdi úsh balanyń anasy.

Túrkistandyq jalǵyzbasty ana Sevara Ábdrasılova da bala kútimimen úıinde otyr. Sebebi, kenjesi nebári toǵyz aılyq. Basynda baspanasy joq kelinshek búginde ata-anasynyń úıin panalaǵan. Páter jaldap turýǵa turmystyq jaǵdaıy múmkindik bermeıdi. Osyny eskergen jergilikti ákimdik bul otbasyǵa da tegin azyq-túlik sebetin jetkizip bergen.

«Tuńǵyshym bıyl tórt jasqa toldy. Balalarymnyń bári kishkentaı bolǵan soń, jumysqa da shyǵa almaımyn. Ata-anammen turǵanymmen olardyń da balalary kóp. Tapqan tabystary ózderinen artylmaıdy. Qazir karantın kezinde tipti jaǵdaıymyz qıyndap ketti. Al, memleket tarapynan berilgen azyq-túlikter bizge demeý bolyp otyr. Balalarymmen birge biraz ýaqytqa jetedi»,- deıdi Sevara Ábdrasılova.