Prezıdenttik qoldaý: ShQO-da 220 myń adam 42 500 teńgeden aldy
Bul jaıly aımaq basshysy Danıal Ahmetov óziniń Instagram paraqshasynda jazdy.
«Aldyn ala qabyldanǵan sharalardyń arqasynda oblys aýmaǵynda koronavırýs ınfektsııasynyń taralýyn birshama tejedik. Alaıda COVID-19-dy juqtyrý jaǵdaılary kórshi aımaqtarda kún sanap artyp keledi. Sondyqtan qaýip deńgeıi joǵary. Tótenshe jaǵdaı rejıminde ShQO-daǵy iri ónerkásip oryndarynyń ekonomıkalyq belsendiligin saqtaı aldyq. Jalpy oblystyń tirshiligin qamtamasyz etýdiń barlyq qurylymdary jumysyn jalǵastyrýda. Áleýmettik mańyzdy nysandardyń qurylysy, joldardy jóndeý, abattandyrý qarqyndy júrip jatyr. 20 myń jumys ornyn qurý kózdelgen «Jumyspen qamtýdyń jol kartasy« baǵdarlamasynyń ınfraqurylymdyq jobalary erekshe baqylaýda», - deıdi ákim.
Onyń aıtýynsha, halyq aldyndaǵy áleýmettik mindettemelerdi oryndaý týraly Prezıdent tapsyrmasyna saı, 220 000 shyǵysqazaqstandyq 42500 teńgeden járdemaqy alǵan.
«Sonymen qatar barlyq blokposttarda «jasyl dáliz« tıimdi jumys istep tur. Turǵyndar saıajaıǵa kedergisiz bara alady. Qyzmet kórsetý salasynyń kóptegen nysandary onlaın rejımde jumys isteıdi. Basty talap – áleýmettik qashyqtyq pen qaýipsizdikti saqtaý. Bárimiz jaqyndarymyzdyń densaýlyǵy úshin shydamdylyq pen jaýapkershilik tanytýymyz kerek. Aldaǵy 10 kúnde epıdemıologııalyq jaǵdaı turaqtalyp, koronavırýs anyqtalmasa, biz karantın rejımin jeńildete alamyz. Bul qyzmet kórsetý salasynyń birqatar kásiporyndary burynǵy jumys rejımine qaıta oralatynyn bildiredi», - deıdi Danıal Ahmetov.