Prezıdenttik qoldaý: ShQO-da 158 myńǵa jýyq adam kommýnaldyq qyzmetter úshin ótemaqy alady

ÓSKEMEN. QazAqparat – Shyǵys Qazaqstan oblysynyń 158 myńǵa jýyq turǵyny kommýnaldyq shyǵyn úshin 15 myń teńgeden ala alady, dep habarlady QazAqparat tilshisi.

ShQO Energetıka jáne turǵyn úı-kommýnaldyq sharýashylyq basqarmasynyń basshysy Dáýlet Batyrbaevtyń aıtýynsha, ótemaqy kommýnaldyq qyzmetterdi jetkizýshilermen kelisimi bar azamattardyń jekelegen sanattaryna tólenedi.

«Jalpy óńir boıynsha 158 myńǵa jýyq adam kommýnaldyq shyǵyn úshin 15 myń teńgeden alýǵa quqyly. Ol úshin jergilikti atqarýshy organdardyń call-ortalyqtaryna, qalalar men aýdandardyń turǵyn úı-kommýnaldyq sharýashylyq bólimderine habarlasa alasyz. Sodan soń mamandarǵa jeke sáıkestendirý nómirińizdi (JSN), abonenttik shotyńyzdy jáne áleýmettik mártebeńizdi aıtýyńyz kerek», - deıdi basqarma basshysy.

Onyń aıtýynsha, 21 sáýirde turǵyndardan 400-den astam qońyraý túsken. Osy oraıda oblystyń barlyq qala, aýdandarynda arnaıy shtabtar jumys isteýde.

Esterińizge sala ketsek, osyǵan deıin karantındegi óńir turǵyndary kommýnaldyq shyǵyn úshin 15 myń teńgeden alatyndyǵy týraly habarlanǵan.