Prezıdenttik kadr rezervi: 152 azamat túrli qyzmetke taǵaıyndaldy
«Jas mamandarmen kezdesý arqyly Prezıdenttiń jańa Joldaýyndaǵy jańa bastamalary jóninde sóz qozǵap, olardyń mańyzdylyǵyn birge talqylaýdy jón kórip otyrmyz. Joldaýdy qalaı júzege asyramyz? Qandaı qosymsha sharalardy qabyldaý kerek? Nelikten? Sebebi Joldaýda aıtylǵan bastamalardy júzege asyratyn – búgingi zalda otyrǵan jas mamandar. Búgingi kezdesý bizdiń túsinigimizdegi úgit-nasıhat maqsatyndaǵy túsindirme jumysy emes, Joldaýdaǵy aıtylǵan bastamalardy birlese otyryp talqylaý jáne olardy erteń júzege asyrý. Sebebi búgingi sharaǵa kelgen jas mamandar – ártúrli mınıstrlik pen ákimdikten kelgen azamattar», - dedi Erlan Qarın Prezıdenttik jastar kadrlyq rezervindegi azamattarmen kezdesý kezinde.
Onyń aıtýynsha Prezıdenttik jastar kadrlyq rezervin qurý – Memleket basshysynyń saılaýaldy baǵdarlamasynyń negizgi ıdeıalarynyń biri bolǵan.
«Saılaýdan keıin kadrlyq rezervti jasaqtaý jumysyna kirisip, irikteý jumysy úsh aıǵa sozyldy. Sonyń arqasynda úsh júzge jýyq jas maman irikteldi. Qazirgi ýaqytta olardyń jartysynan kóbi – 152 maman ártúrli qyzmetke taǵaıyndaldy. Sondyqtan jas mamandar búgingi kúni ózderiniń múmkindikterin synaýda», - dedi ol.
Eske sala ketsek búgin elordada Prezıdenttik kadrlyq rezervtegi jastar birqatar mınıstrmen kezdesý ótkizdi. Naqtyraq aıtqanda iriktelip, rezervke engen jastarmen kezdesýge Aqparat jáne qoǵamdyq damý mınıstri Aıda Balaeva, Tsıfrlyq damý, ınnovatsııalar men aeroǵarysh ónerkásibi mınıstri Baǵdat Mýsın, Prezıdent ákimshiligi basshysynyń orynbasary Málik Myrzalın, sondaı Prezıdenttiń kómekshisi Erlan Qarın shaqyrylǵan. Basqosýdyń basty maqsaty – Prezıdent Joldaýyn talqylap, aldaǵy ýaqytta Prezıdenttik jastar kadrlyq rezervin damytyp, júzege asyrýdy josparlaý.