Prezıdenttik kadr rezervi: 10 adam UEM-de basshylyq qyzmet etedi
Kezdesýde Rýslan Dálenov kadrlyq rezervtiń maqsaty jastar úshin aıqyn áleýmettik saty qurý ekenine nazar aýdardy. Rezervtegilerdiń ekonomıkanyń túrli salalarynda edáýir jumys tájirıbesi barlyǵyn atap kórsetti. Olardyń kóbi ekonomıkanyń túrli salalaryndaǵy iri sheteldik jáne transulttyq kompanııalarda jumys isteýde nemese istegen.
«Kadrlyq rezervpen jumys isteı kele, biz olardyń ishinen ortalyq apparattyń departament dırektory men dırektordyń orynbasary tárizdi mınıstrliktegi basshylyq qyzmetke, sondaı-aq kvazısektordaǵy basshylyq laýazymdarǵa 10 mamandy taǵaıyndadyq», - dedi mınıstr.
Rezervtegiler ashyq dıalog barysynda elimizdegi ózekti ekonomıkalyq máselelerge qatysty óz paıymdarymen bólisti. Ol máselelerdiń qatarynda kásipkerlikti, MJÁ-ni, bıýdjettiń 4 deńgeıin, Aqtóbe oblysynyń ınvestıtsııalyq tartymdylyǵyn, monoqalalardy damytý bar.
Óz kezeginde, Rýslan Dálenov talantty jastarmen odan arǵy pikir almasý jáne mańyzdy taqyryptardy talqylaý úshin «QR UEM rezervshileriniń kúnin» belgileý ıdeıasyn ortaǵa saldy.
«Sizderge Memleket basshysynyń zor senimin aqtap, óz talanttaryńyzdy tanytýǵa jáne bilimderińizdi Otanymyzdyń ıgiligi jolyna arnaýlaryńyzǵa tilektespin», - dedi ol.
Rezervshilerdiń qataryna 106 jeke sektor ókili, 98 kvazımemlekettik sala qyzmetkeri men 96 memlekettik qyzmetshi enip otyr. Úmitkerlerdiń 58 paıyzy shetelde bilim alsa, 42 paıyzy qazaqstandyq joǵary oqý oryndarynyń túlekteri. 6 adam ǵylym doktory bolsa, 204 adam magıstr dárejesine ıe.