Prezıdenttik ınstıtýtqa 30 jyl: Sarapshylar qandaı máselelerdi talqylap jatyr

NUR-SULTAN. QazAqparat – Qazaqstandyq jáne halyqaralyq saıası, áleýmettik sarapshylar elimizdegi prezıdenttik basqarý júıesine 30 jyl tolýyna oraı ótken «Prezıdenttik basqarý nysany. Konstıtýtsııalyq negiz jáne saıası tájirıbe» atty halyqaralyq onlaın konferentsııada oılaryn ortaǵa salyp, pikir almasty, dep habarlaıdy QazAqparat tilshisi.

«Búgin – elimiz úshin mańyzdy kún. Sebebi dál búgin Qazaqstanda prezıdenttik ınstıtýttyń engizilgenine týra 30 jyl tolyp otyr. Osydan 30 jyl buryn Qazaq SSR Konstıtýtsııasyna tıisti túzetýler engizilip, Qazaqstan SSR Prezıdenti bolyp Nursultan Nazarbaev saılanǵan edi. Osylaısha jańa quqyqtyq ınstıtýt jumysyn bastady», - dedi jıyndy ashqan QR Tuńǵysh Prezıdenti – Elbasy qory atqarýshy dırektorynyń orynbasary Igor Rogov.

Onyń aıtýynsha konferentsııa qazir álemdegi pandemııa kezinde onlaın rejımde uıymdastyryp otyrǵanyn jetkizdi.

«Áıtse de osynaý aıtýly oqıǵany tereń taldap, zańgerlik, saıası jáne fılosofııalyq analız júrgizýge degen ǵalym-praktıkterdiń tilegimen búgingi konferentsııany uıymdastyryp otyrmyz. Jańa bılik ınstıtýty men Nursultan Nazarbaevtyń tulǵalyq róli – osy eki faktor bizdiń elimizdiń damý jolynda qandaı rólge ıe? Osy suraq tóńireginde sarapshylardyń basyn qostyq. Shaqyrtýymyzdy qabyl alǵan azamattardyń bárine alǵysymyzdy bildiremiz», - dedi ol.