Prezıdentti halyq ózi saılasa, naǵyz demokratııa degen sol - Jumash Kenebaev

ALMATY. QazAqparat - Belgili aqyn, «Jastar» arnasynyń bas redaktory Jumash Kenebaev Qazaqstan Prezıdentin kezekten tys saılaý týraly oıymen bólisti, dep habarlaıdy QazAqparat.

Ol búgingi QR Prezıdenti Qasym-Jomart Toqaevtyń saıası málimdemesin mańyzdy tarıhı oqıǵa dep baǵalady.

«Búgin QR prezıdenti Qasym-Jomart Toqaev saıası málimdeme jasady. Jasyratyn eshteńe joq, bul qazaq eli tarıhyndaǵy asa mańyzdy oqıǵa. Elde ádil saılaý ótýi kerek. Toqaevtyń «ádil ótkizemin» degeni júzege assa, el basyna qazaq tilin, ulttyq múddelerdi birinshi orynǵa qoıatyn azamat kelse jaqsy bolady. Prezıdentti halyq ózi saılasa, qandaı tamasha. Naǵyz demokratııa degen sol», - dedi Jumash Kenebaev.

Aıta ketý kerek, búgin Aqorda Memleket basshysy Qasym-Jomart Toqaevtyń Qazaqstan Respýblıkasy Prezıdentiniń kezekten tys saılaýyn taǵaıyndaý týraly Jarlyǵyn jarııa etti.

Jarlyqqa sáıkes, Qazaqstan Respýblıkasy Prezıdentiniń kezekten tys saılaýy 2019 jyldyń 9 maýsymynda ótetin boldy.

Óz sózinde Qasym-Jomart Toqaev saılaýdyńǵ ashyq, ádil ótetinine ózi kepildik beretinin aıtty.

«Qazaqstan - demokratııalyq memleket. Prezıdent halyqtyń tańdaýymen saılanady. Men, Memleket basshysy retinde, saılaýdyń taza, ashyq ári ádil ótýine kepildik beremin! Bul - meniń berik ustanymym! Aldymyzda zor mindetter tur. Men halqymyzǵa, ıaǵnı Sizderge senemin», - dedi Qasym-Jomart Toqaev.