PREZIDENTTEN UOS ARDAGERLERІNE: Prezıdent saıasatyna rızamyz - Rafık Valıev

ASTANA. QazAqparat - Qazaqstan Prezıdenti Nursultan Nazarbaev Uly Otan soǵysy ardagerlerin qoldaý boıynsha jalpyulttyq bastama kóterdi. 2015 jyl Uly Otan soǵysyndaǵy Jeńistiń 70 jyldyǵy týy astynda ótetin bolady. Astana qalasyndaǵy «Tań» tatar-bashqurt etnomádenı birlestigi atalǵan sharaǵa qoldaý kórsetip qana qoımaı, oǵan belsene qatysýda, deıdi Qazaqstan halqy Assambleıasy Keńesiniń múshesi, Astana qalasyndaǵy «Tań» tatar-bashqurt etnomádenı birlestiginiń basqarma tóraǵasy Rafık Valıev.

Uly Otan soǵysynyń ardagerleri Kashfýlla Zıgangırovti 91 jyldyǵymen, Bıbifaýzııa Taıgýnovany 90 jyldyǵymen quttyqtadyq. Olarǵa azyq-túlik jıyntyǵy men aqshalaı syılyq tabystaldy. Quttyqtaýǵa qatysqan Salıh Erneev ardagerlermen áńgime kezinde elimizdiń tabystary týraly áńgime qozǵady:

«Soǵys jeńimpazdaryna qashan da qurmet pen qoldaý kórsetý - bizdiń paryzymyz. Bizder úshin sizder árkez erliktiń, elikteýdiń úlgisi bolyp tabylasyzdar», - dedi ol.

Tyl eńbekkeri Faǵıla Qaraǵojına men «Dýslyk» ansambliniń múshesi Halıma Sharıpova ardagerlerge arnap jastyq shaqty eske túsiretin tatar halyq ánderin oryndap berdi.

«Bizdiń Prezıdenttiń aǵa býyn ókilderine qamqorlyq tanytý saıasatynyń arqasynda biz esh tarshylyq kórip otyrǵanymyz joq. Sondyqtan Elbasyna, basqa da el azamattaryna alǵysymyz sheksiz», dedi rızashylyǵyn jasyra almaǵan K.Zıgangırov.

Bizder, Qazaqstan halqy Assambleıasynyń músheleri Elbasynyń ardagerlerge qamqorlyq kórsetý jónindegi bastamasyn tolyqtaı qoldaımyz. Jalpyulttyq aktsııany jasyna, ultyna qaramastan, barlyq qazaqstandyqtar jalǵastyryp áketýleri tıis. Óıtkeni, Uly Otan soǵysyndaǵy Jeńis - barshamyzdyń ortaq Jeńisimiz, dep jazady egemen.kz.