Prezıdentten alǵan marapat mereıimdi ósirdi – ustaz Pernebaı Arynov

TÚRKІSTAN. QazAqparat - Saýran aýdany Qosmezgil eldi mekeninde ornalasqan Qyzyl ásker orta mektebiniń muǵalimi Pernebaı Arynov QR Prezıdenti Qasym-Jomart Toqaevtyń qolynan «Shapaǵat» medalin aldy. Bul aýyl muǵaliminiń abyroıyn arttyryp, mereıin ósirdi, dep habarlaıdy QazAqparat tilshisi.

Búginde ulaǵatty ustaz taqqan «Shapaǵat» medalin qyzyqtap kórýshiler kóp.

Aýyldyń atyn shyǵaryp, abyroıyn arttyrǵan azamattyń esimin jerlesteri de maqtanyshpen aıtyp otyr.

Al, shapaǵattyń sharapatyna bólengen ustaz bul marapat eńbekti eseleı túsý úshin serpilis syılaǵandyǵyn jetkizdi.

«Bul tek qana meniń ǵana marapatym emes, barlyq Túrkistan oblysynyń ustazdarynyń eńbeginiń baǵasy dep bilemin. Eńbek er atandyrady degen osy bolar» - deıdi ol.

Pernebaı Arynov 2001 jyldan beri Qyzyl ásker jalpy orta mektebinde geografııa pániniń muǵalimi bolyp qyzmet atqaryp keledi.

Aýyl mektebiniń áleýetin arttyryp, shákirtterge sapaly bilim men sanaly tárbıe berý isinde jetken jetistikteri kóp.

UBT-dan úzdik shyqqan oqýshylary búginde elimizdiń bedeldi oqý oryndarynda oqyp júr.

Odan bólek, oqytqan balalary aýdandyq, oblystyq, tipti respýblıkalyq bilim báıgesinen jeńimpaz atanǵan.

Ózi de jıi jıi bilimin jetildirip, biliktiligin arttyryp otyrady. Baıqaýlarǵa qatysyp, júldeli oryndardy ıelengen kezderi kóp.

Máselen, «Úzdik geografııa alańy» qalalyq baıqaýynan 3-oryn, qalalyq pán muǵalimder olımpıadasynan 1-oryndy jeńip alǵan ustaz QR Bilim jáne Ǵylym mınıstrligi «Qurmet» gramotasymen marapattalyp, «Eń úzdik muǵalim» atanǵan.

Sondaı-aq, aýdan ákiminiń, «Amanat» partııasynyń alǵys hatyn ıelendi. Eńbek jolynda birneshe maqalasy qalalyq jáne respýblıkalyq baspasóz betterinde jarııalandy.

«El úshin eńbek etip, jas urpaqqa tálim-tárbıe berip júrgenimdi maqtan tutamyn. Prezıdentimizdiń jyl saıynǵy joldaýlaryna sáıkes qazirgi tańda muǵalimderdiń jalaqysy ósip, mártebesi artyp keledi. Bilimge degen kózqaras ta ońaldy. Uly Abaı atamyzdyń «Adam balasy adam balasynan aqyl, ǵylym, ar, minez degen nárselermen ozady» - degen sózderi búgingi kúni de mańyzyn joǵaltpaǵan. Sondyqtan jastardyń sapaly bilim alyp, sanaly azamat bolýy jolynda jasalyp jatqan memlekettik qoldaýlar úshin Prezıdentimizge alǵys aıtamyn» - deıdi Pernebaı Saparbaıuly.