Prezıdentke sheteldik delegatsııalar tartý etken tapanshalar kórmege qoıyldy
Prezıdenttik ortalyqtyń mýzeı qoryndaǵy biregeı qarý-jaraq toptamasynyń negizinde jasalǵan bul kórme QR Qarýly Kúshteriniń tarıhyna, Ekinshi dúnıejúzi soǵysynda erlik kórsetken Halyq qaharmandary — Saǵadat Nurmaǵambetov pen Raqymjan Qoshqarbaevtyń 100 jyldyǵyna arnalǵan.
QR prezıdenttik ortalyǵynyń Ekskýrsııa jumysy qyzmetiniń basshysy Gúlim Ydyrysovanyń aıtýynsha, ınjenerlik oıdyń, ǵylym men tehnıkanyń damýy qarýdyń jańa túrleri — atys qarýyn jasaýǵa yqpal etti.
Bul jádigerler — táýelsizdik jyldary el Prezıdentine kelip túsken dıplomatııalyq tartýlar.
Ásirese, Reseı, AQSh, Frantsııa, Shveıtsarııa memleketinen kelgen delegatsııa ókilderiniń syıy bar.
Keıbir tapanshalar eksklıýzıvti arnaıy tapsyryspen jasalǵan, oǵan qosa kóshirme nusqalar da bar.
«Búgingi kórmege mýzeı qorynan 100-ge jýyq eksponat shyǵaryldy. Sonyń ishinde 29 tapansha bar. Onda kelýshiler tapanshalardyń adamzat tarıhyndaǵy jasalý kezeńinen bastap, qazirgi zamanǵa deıingi úlgilerin kóre alady. Mýzeı qorynan arnaıy alǵash ret shyǵyp otyrǵan tapanshalar arasynda Býndel revolveri, Lefoshe revolveri jáne dýel tapanshalary sekildi antıkvarlyq úlgiler de bar. Atys qarýymen qatar, mýzeı qoryndaǵy sýyq qarý toptamasynan da birqatar jádiger qoıylǵan. Olardyń barlyǵyn kezinde memleketimizge kelgen sheteldik delegatsııa ókilderi tartý etken. Bul syılyqtar mýzeı qoryna túsip, júıeli túrde zerttelgen soń ǵana kórermen nazaryna usynylady», — dedi G. Ydyrysova.
Ekspozıtsııa Lefoshe, Kolt, Braýnıng, Federle, Stechkın jáne basqa da kórneki qarý jasaýshylardyń týyndylarymen tanysýǵa múmkindik beredi.
Eýropa, AQSh, Reseı jáne Túrkııadaǵy jahandyq qarý óndirýshilerdiń tapanshalary men revolverleri qoıylǵan.
Sonymen birge, kórmede Uly Otan soǵysy jyldaryndaǵy qazaqstandyq jaýyngerlerdiń erlikteri týraly materıaldar qoıylǵan.
1992 jyly 7 mamyrda qurylǵan QR Qarýly Kúshteriniń qalyptasýy men damý tarıhy da usynylǵan.
Kórme 30 mamyrǵa deıin jalǵasady.
Ony barlyq kelýshiler tegin tamashalaı alady.