Prezıdentke Naýryz meıramyna oraı quttyqtaý jedelhattary kelip jatyr
Qytaı Halyq Respýblıkasynyń Tóraǵasy Sı Tszınpın Qasym-Jomart Toqaev pen qazaqstandyqtardy Naýryz meıramymen quttyqtady.
– Men qazaq-qytaı baılanystaryn damytýǵa basa mán beremin. Eki el arasyndaǵy dástúrli dostyqty nyǵaıtýǵa negizdelgen ózara tıimdi jáne jan-jaqty yntymaqtastyqty keńeıtý úshin Sizben kúsh-jiger biriktirýge daıynmyn, - dep jazylǵan jedelhatta.
AQSh Prezıdenti Djozef Baıden quttyqtaýynda elderimizdiń klımattyq daǵdarys, energetıkalyq qaýipsizdik jáne ekologııa máselelerin sheshý isindegi keıingi jyldary qol jetkizgen tabystaryn maqtan tutatynyn atap ótken.
– Bul yntymaqtastyq urpaq bolashaǵyn jarqyn etýge septigin tıgizedi. Úmit pen jańarýdyń nyshany bolyp sanalatyn Naýryzda elderimizdiń arasyndaǵy seriktestik pen halyqtarymyzdyń dostyǵy odan ári nyǵaıa beretinine senimdimin, - delingen jedelhatta.Túrkııa Prezıdenti Rejep Taııp Erdoǵan quttyqtaýynda Naýryzdyń jaqsylyq pen molshylyqtyń meıramy ekenine nazar aýdarǵan.
– Ortaq mádenıetimizdiń mańyzdy bóligi sanalatyn osy aıtýly kúnde dostyq pen baýyrlastyq baılanystarymyz odan ári nyǵaıa túserine senim bildiremin, - dep jazylǵan jedelhatta.Ózbekstan Prezıdenti Shavkat Mırzıëev óz quttyqtaýynda baýyrlas halyqtar bul meıramdy myńdaǵan jyldan beri saltanatty túrde ári keń kólemde toılap kele jatqanyn aıtty.
– Ózara senimge, qurmet pen ortaq múddege negizdelgen baýyrlas jáne kórshiles eki el arasyndaǵy yntymaqtastyq odan ári nyǵaıyp, qarqyndy túrde damı beretinine senimdimin, - dep jazylǵan jedelhatta.Qyrǵyzstan Prezıdenti Sadyr Japarov quttyqtaý jedelhatynda kóneden kele jatqan Naýryz meıramy qyrǵyz ben qazaq halyqtarynyń tarıhy men qundylyqtarynyń ortaq ekenin bildiretinin atap ótken.
– Aldaǵy ýaqytta júzege asyrylatyn ekijaqty is-sharalardyń nátıjeleri elderimiz arasyndaǵy saıası dıalogtyń joǵary deńgeıde ekenin naqtylap, qyrǵyz-qazaq yntymaqtastyǵyn odan ári nyǵaıtýǵa yqpal etetinine senim bildiremin, - dep jazylǵan jedelhatta.
Tájikstan Prezıdenti Emomalı Rahmon quttyqtaý jedelhatynda myńdaǵan jyldan beri adamzatqa jol siltep kele jatqan berekeli Naýryzdyń kóne ǵuryptary men baı rýhanı taǵylymy qazir de adamdarǵa shattyq syılaıtynyn aıtqan.
– Naýryz merekesiniń ıgi dástúrleri elderimiz arasyndaǵy dostyq pen san qyrly yntymaqtastyqty nyǵaıtýǵa septigin tıgizedi. Sondaı-aq ózara yqpaldastyǵymyz strategııalyq seriktestik pen odaqtastyq aıasynda odan ári keńeıe beretinine senimdimin, - dep jazylǵan jedelhatta.Túrikmenstan Prezıdenti Serdar Berdimuhamedov quttyqtaýynda álemniń kóptegen elinde keńinen toılanatyn osy ǵajap mereke kóktemniń kelýi men tabıǵattyń qaıta túleýin bildiretinin jetkizgen.
– Naýryzdyń barshaǵa málim dástúrleri men mádenı ádet-ǵurpy yntymaqtastyq pen ózara túsinistikti dáripteıdi. Bul qundylyqtar qazirgi kezeńde eń ózekti másele sanalady jáne halyqtarymyz arasyndaǵy beıbitshilik pen dostyqty nyǵaıtýǵa yqpal etedi, - dep jazylǵan jedelhatta.Ázerbaıjan Prezıdenti Ilham Álıev quttyqtaý jedelhatynda kóktemgi kóterińki kóńil-kúı syılaıtyn Naýryz merekesiniń ejelgi dástúrleriniń saqtalýy san ǵasyrlyq mádenı muramyzǵa kórsetken qurmetimizdiń bir belgisi sanalatynyn jazǵan.
– Jýyrda Ázerbaıjanǵa jasaǵan memlekettik saparyńyzdy, shynaıy jáne ózara senim jaǵdaıynda ótken kezdesýimizdi, ekijaqty qarym-qatynastardyń barlyq salasy men yntymaqtastyǵymyzdyń perspektıvasy boıynsha júrgizgen jan-jaqty kelissózderimizdi zor rızashylyqpen eske alamyn. Aldaǵy ýaqytta da Ázerbaıjan men Qazaqstannyń dostyǵyn, baýyrlastyǵyn odan ári nyǵaıtýǵa bar kúsh-jigerimizdi jumsaıtynymyzǵa senimdimin, - dep jazylǵan jedelhatta.Iran Islam Respýblıkasynyń Prezıdenti Ibrahım Raısı quttyqtaý jedelhatynda Naýryz merekesin beıbitshilik pen tatýlyqtyń, dostyq pen yntymaqtyń sımvoly dep atap ótken.
– Kún men tún teńelip, tabıǵattyń jańǵyrýymen adamdardyń boıynda izgi qasıetter qalyptasady. Osy arqyly adamzat jat qylyqtan arylyp, qoǵamymyz kemeldene túsedi, - delingen jedelhatta.Sonymen qatar óz quttyqtaýlaryn Túrikmenstan Halk Maslahatynyń tóraǵasy Gýrbangýly Berdimuhamedov, UQShU Bas hatshysy Imanǵalı Tasmaǵambetov, Ekonomıkalyq yntymaqtastyq uıymynyń Bas hatshysy Hýsrav Nozırı, Túrki memleketteri uıymynyń Bas hatshysy Kýbanychbek Ómirálıev, TÚRKSOI uıymynyń Bas hatshysy Sultan Raev jáne ózge de halyqaralyq uıymdardyń, kompanııalardyń, oqý oryndarynyń basshylary men basqa da resmı tulǵalar joldady. Quttyqtaýlar áli de kelip túsip jatyr.