Prezıdentke qastandyq jasamaq bolǵan kúdiktige qatysty málimetti UQK beredi – Senat tóraǵasy
Senattyń jalpy otyrysynan keıin tilshiler palata spıkerinen QR Prezıdentine qastandyq jasamaq bolǵan shetel barlaý agentiniń ustalýyna qatysty suraq qoıdy.
«Qazirgi jaǵdaı aqparattyq turǵydan ońaı emes. Ártúrli aqparat pen feıkter bar. Sondyqtan áleýmettik jelilerdegi aqparattarǵa ustamdylyqpen qaraý kerek. Birqatar aqparat kózderin qarap, zerdelegen jón. Sizderdiń suraqtaryńyzǵa toqtalsam, qastandyq qadamdary týraly jaýap bere almaımyn. Bul máselege qatysty Ulttyq qaýipsizdik komıtetiniń qyzmetkerleri tergeý amaldary aıaqtalǵannan keıin naqty aqparatty bere alady», -dedi M. Áshimbaev.
Osy oraıda Senat tóraǵasy tergeýdiń aıaqtalǵanyn kútý kerek ekenin aıtty.
«Qazir áleýmettik jelilerde tarap jatqan kez kelgen aqparatqa sene salýǵa bolmaıdy. Olarǵa syn kózben qaraǵan jón. Bizge naqty shyndyqty tergeý júrgizip jatqan memlekettik organ ǵana aıta alady. Ulttyq qaýipsizdik komıteti tergeý amaldaryn júrgizip jatyr. Kúdikti der kezinde ustaldy. Zań rásimi boıynsha tergeý júrgizilip jatyr», - dedi Máýlen Áshimbaev.
Budan buryn habarlanǵandaı, 25 naýryzda elordada QR Prezıdentine jáne birqatar joǵary laýazymdy memlekettik qyzmetkerlerge qastandyq jasaýdy josparlaǵan sheteldiń barlaý agenti «A» degen Qazaqstan azamaty ustaldy.
Bir mezgilde ol arnaýly jáne quqyq qorǵaý organdary qyzmetkerlerine qatysty terrorıstik aktiler jasaýdy josparlaǵan.
Aldyn ala tergeý barysynda kúdikti QR azamaty joǵaryda kórsetilgen isterdi shetel memleketiniń tapsyrmasy jáne múddesinde jasaǵanyn moıyndady.
Qazirgi kezde UQK Qylmystyq kodekstiń 24-baby 1-bóligi (qylmysqa daıyndalý jáne qylmysqa oqtalý) jáne 255-baby 4-bóliginde (terrorızm aktisi) kózdelgen qylmysty jasaý faktileri boıynsha tergeý júrgizýde.