Prezıdentke ınfraqurylymdyq nysandardyń qurylys barysy tanystyryldy
Memleket basshysyn Oral - RF shekarasy avtojol ýchaskesi qurylysynyń bastalýy jáne «Aqtaý Teńiz porty» EEA-nda 3 qurǵaq júk termınaly qurylysynyń aıaqtalǵandyǵy týraly habardar etti.
«Qurmetti Nursultan Ábishuly! Joldaýyńyz boıynsha Astana men óńirlerdi baılanystyratyn uzaqtyǵy 7 myń shaqyrym 11 avtojol jobasyn iske asyrý kózdelgen. Avtojol jobalaryn iske asyrý barysynda 200 myńǵa jýyq adam jumyspen qamtylady. 2020 jylǵa deıin qozǵalys qarqyndyǵy 2,5 ese ósedi. Avtomobıl kóligimen tranzıt 2 esege artady. Basym jobalardyń biri - Astana men Almaty arasyn Qaraǵandy, Balqash jáne Qapshaǵaı qalalary arqyly baılanystyratyn, I sanattaǵy, jalpy uzaqtyǵy 1 282 km «Ortalyq-Ońtústik» dálizi bolyp tabylady. Astana men Almaty arasynda jol júrý ýaqyty 6 saǵatqa azaıady. Qazir biz «Almaty-Qapshaǵaı» ýchaskesinde turmyz. Bıyl osy ýchaske boıymen bir baǵyttaǵy jol qozǵalysyn ashýdy josparlap otyrmyz»,-dedi QR Investıtsııalar jáne damý jónindegi 1-shi vıtse-mınıstri Jeńis Qasymbek.
Óz kezeginde Pavlodar oblysynan sóılegen «Qazavtojol UK» AQ Basqarma tóraǵasynyń orynbasary Ulan Álipov baǵdarlamanyń iri jobalarynyń biri - Pavlodar men Semeı qalalary arqyly ótetin jalpy uzyndyǵy 1 018 shaqyrym quraıtyn «Ortalyq-Shyǵys» dálizi bolyp tabylatyndyǵyn atap ótti.
«Qazirgi tańda jumystar 500 km bolatyn 16 ýchaskede júrgizilýde, onyń ishinde 100 km bıylǵy jyly paıdalanýǵa beriledi. Qazir, biz atalǵan dálizdiń qurylysy júrgizilip jatqan nysandardyń birinde Ertis ózeni arqyly ótetin kópir ótkelinde turmyz. Qurylys jumystary óndiristik kestege sáıkes júrgizilýde, kelesi jyly Astananyń jolyn «Pavlodar-Semeı» avtojolymen osy kópir arqyly baılanystyramyz. Bul ótkel Pavlodar qalasynda ornalasqan Ertis ózeni arqyly ótetin jalǵyz eski kópirdiń jumysyn jeńildetedi»,-dedi ol.
Budan bólek, «Qazavtojol UK» AQ Basqarma tóraǵasy Ermek Qızatov «Nurly jol» memlekettik baǵdarlamasy aıasynda «Ortalyq-Batys» kólik dáliziniń qurylysymen tanystyrdy.
«Bul joba Astanany Qazaqstannyń batys oblystarymen sapaly avtokólik joly arqyly baılanystyrady. Sondaı-aq, makroaımaqtyń tutas damýyna yqpaly etip, Reseı naryǵyna otandyq taýarlardy eksporttaý múmkindigin arttyrady. Atalǵan joba Reseıdiń ońtústiktegi Astrahan, Volgograd jáne Saratov qalalaryna shyǵýǵa múmkindik beredi. Búgin «QazAvtoJol» Ulttyq kompanııasy «Oral - Tasqala - Saratov» ýchaskesin jańǵyrtýǵa daıyn. Qurmetti Prezıdent, jumysty bastaýǵa ruqsat suraımyz!» -dedi Qızatov.