Prezıdent jylý energetıkasy týraly: Úkimettiń qoly qordalanǵan problemalardan bosamaı jatyr

ASTANA. QazAqparat – Ortalyqtandyrylǵan jylýmen qamtamasyz etilgen 80 qalada júıeniń tozý kórsetkishi 92%-ǵa deıin jetken. Úkimettiń keńeıtilgen keńesinde Memleket basshysy Qasym-Jomart Toqaev osyndaı derek keltirdi, dep habarlaıdy QazAqparat tilshisi.

«Infraqurylymdy, birinshi kezekte kommýnaldyq ınfraqurylymdy odan ári damytý jónindegi jumysty túbegeıli qaıta qurý qajet. Osy qysta jylýmen qamtamasyz etý salasynyń sátsiz jumysy azamattardyń narazylyǵyn týdyrdy. Jylý-elektr ortalyqtarynyń jartysynan kóbi qaýipti deńgeıde, keıbir qalalarda tozý deńgeıi 80%-dan asty», - dedi Memleket basshysy.

Qasym-Jomart Toqaev eldegi jylý jelileriniń ortasha tozý kórsetkishi 54%-dyń tóńiregine jetkenin de atap ótti.

«Al ortalyqtandyrylǵan jylýmen qamtamasyz etilgen 80 qalada bul kórsetkish 75-ten 92%-ǵa deıin. Kommýnaldyq salany jańǵyrtý maqsatynda men «Investıtsııa ornyna tarıf» saıasatyna kóshýdi qamtamasyz etýdi tapsyrdym. Qazirgi jaǵdaıda Úkimet jyldar boıy qordalanǵan máselelerdi sheshýge májbúr bolady. Biraq basqa jol joq», - dedi Prezıdent.

Aıta keteıik, Úkimet úıinde Prezıdent tóraǵalyǵymen eldiń áleýmettik-ekonomıkalyq damý máseleleri jóninde keńes ótip jatyr.